Local council leh village council thenkhatah chhan hrang hrang avangin seat ruak hnawhkhah tur a awm a. Thawhlehni khan heng hmuna inthlan huna hman tur final electoral roll tihchhuah a ni.
Aizawl Municipal huamchhung local council 7-ah by election hi neih a ni dawn a. Hemi atan hian Electoral Rolls Summary Revision 2026 neih niin, kumin June 12 khan draft electoral roll tihchhuah a lo ni tawh. July 7 khan final electoral roll hi district municipal election officer Er Llalhriatpuia’n a tlangzarh.
Hetiang hi local council 7-a by election neih tur leh draft electoral roll atanga final electoral roll-a voter awmzat ni ta chu: Durtlang LC-ah voter mipa 1774, hmeichhia 2080, a vaiin 3854 an awm a; a hma aia voter punna 181 a ni. Zotlang LC-ah voter mipa 1110, hmeichhia 1408, a vaiin 2518 an awm a, voter punna chu 3 a ni. Luangmual LC-ah voter mipa 1756, hmeichhia 2032 awmin, a vaiin 3788 an awm a; voter punna 78 a ni.
Dawrpui Vengthar LC-ah voter mipa 1375, hmeichhia 1765, a vaiin 3140, an awm a, voter punna chu 92 a ni. Bungkawn LC-ah voter mipa 1475, hmeichhia 1786, a vaiin 3261 an awm a, voter hi 283-in an kiam ve thung. Republic LC-ah voter mipa 1468, hmeichhia 1799, a vaiin 3267 an awm a, voter punna hi 68 a ni. Salem Veng LC-ah voter mipa 1993, hmeichhia 2286, a vaiin voter 4279 an awm a, voter punna hi 111 a ni.
By election neihna tur hi Aizawl Municipal Corporation inthlan neih zawh taka local council nilai, corporator atana thlantlin ni ta ho hmun ruak a ni hlawm a. State Election Commission Mizoram chuan inthlan hun hi a la ruat dawn a ni.
Aizawl Municipal-a by election atan LC 7 electoral roll tichhuak
