Aizawl Smart City project tam zawk chu thalaite puala hman a ni tih deputy chief minister Tawnluia chuan a sawi.
Aizawl Smart City Limited (ASCL) hmalaknaa MINECO Multi Level Parking bul hmunruaka mipui vantlang tana tuallenna tur project lungphum a phumnaah UD&PA changtu deputy chief minister chuan ASCL hnuaia hmalakna leh ruahmanna kaltlanga Aizawl khawpui hmel thar lang mek chu lawmawm a tih thu a sawi a. Heng zinga project tam tak, khawpui chhunga infiamna hmunhma thar hmun tam taka siam leh buatsaih mek bakah tunhnaia khawpui chhunga college-te tana smart classroom ruahman chu thalaite pual a ni, tiin, “Smart city project tam tak hian thalaite a tinzawn,” a ti.
Smart City hnuaia project chu a hun pawhsei niin, 2024 June-ah project hi zawhfel vek a ngaih chu Tawnluia hian a sawi a. Hna hi a hun taka an zawh theih nan thawktu zawng zawngte tang mar pata hna thawk turin a chah tih a sawi a ni.
‘Construction of Urban Landscape & Avenue Plantation’ project hi cheng nuai 972 senga MINECO Multi Level Parking leh Open Gym MINECO inkara hmun ruaka sak tum a ni a. Mipui vantlang tuallenna hmun hring leh nuam ni pahfawm a, basketball (half court), open theatre, skate boarding hmun, sky walk leh thildang awm tel tura ruahman a ni.
Aizawl Smart City tam tak hian thalaite a tinzawn – Dy CM
