Aizawl Sumtual leh
Aizawl Dawh-Rem
Aizawl Smart City Ltd. (ASCL) hmalaknaa din, MINECO hmun ami ‘Aizawl Sumtual’ chu Thawhtanni khan UD&PA minister K Sapdanga’n a hawng a. Thawhlehni khan mipui veivakte tana chawlhna tur, Zodin Square-a ‘Aizawl Dawh-Rem’ a hawng bawk.
Aizawl Sumtual hi Rs. 10,12,65,060 senga sak a ni a, contractor chu M/s Mizoram Development Agency an ni. 2023 September 5-ah hna an tan a, kumin November 30 khan an zo fel.
He hmun enkawlzui tur hian open tender chhang sang ber Mizoram Handloom Industry, Tanhril Vengpui thlan an ni a, thla tin Rs. 3,55,555 ASCL-ah an chhunglut dawn a. Mipui tan December 15 atangin tlawh theih a ni ang. A hawn ni hian a enkawlzui tur Mizoram Handloom Industry neitu Lalthazuali hnenah kum hnih chhung atan inremna an ziahpuina lehkha hlan nghal a ni.
Aizawl Dawh-Rem hi state sawrkar sum atanga din niin cheng nuai 145 sen a ni a, contractor chu LHM Infra Khatla niin May 2023-a sak tan a ni a, kumin khan an zo a ni.
Kawngpui anah two-wheeler parking, self help group show room leh storeroom a awm a; in chhawng laita hi Sanitation Site office atan hawn nghal a ni. A enkawl zui turin Mizoram Florists Association nen inremna siam a ni a, kum khat atan cheng nuai khatin an cheiin an enkawlzui ang.
Aizawl Sumtual leh Aizawl Dawh-Rem
