March 1-3 chhung hian G-20 Business Summit, MZU Campus Aizawla neih turah India ram chhung leh rampawn atangin mi pawimawh, delegates/official thahnem tak an rawn kal dawn avangin an chetvelnaah harsatna an tawh loh na’n Mizoram sawrkar hriattirna dinglai leh danin thuneihna a pek angin senior SP Traffic Aizawl chuan hmun thenkhatah lirthei tlan dan tur thupek a chhuah.
March 2 (Ningani) zing dar 7.00 atanga zan dar 9.00 chhungin Zarkawt Traffic Point atangin Dawrpui, Venghlui, Tuikual South (Tennis Court, Temple Square), Tuikual North, Dinthar, Dawrpui Vengthar, Vaivakawn Zohnuai, Chawlhhmun, Tuivamit, Tanhril (MZU road) inkarah G-20 meeting tur VVIP/delegates/ official-te chetvelna tibahlah thei lirthei leh bungrua engmah dah phal a ni lo tih a sawi.
Hemi kaihhnawiha Aizawl khawpui chhung kawngpui PWD-in a thawmthat mekah, Chanmari West atanga Vaivakawn inkar kawng siamthat hna chu February 28 atanga March 1 inkara thawh a nih dawn avangin, zing dar 9.30 atanga tlai dar 4.00 inkar he kawng hi khar a ni dawn tih mipui a hriattir a. Hnathawh tibuai thei turin hnathawhna huamchhung kawngpuiah lirthei leh bungrua dah phal a ni lo tih SP Traffic hian a sawi a. March 1 hian G-20 meeting-a tel tur delegates/official ten Aizawl an lo thlen dawn avangin he hriattirna hi a tul dan anga tih danglam theih a ni dawn tih a sawi tel bawk.
PWD hian Venghlui Approach Road Junction (Treasury Square atanga Pi Pangi Peng bul, Venghlui pan thlakna) kawng pawh an siamthat dawn avangin February 28 (Thawhlehni) chawhma dar 10.00 atanga tlai dar 5.00 inkar khar a ni dawn tih mipui hriattirin, hnathawh tibuai thei turin hnathawhna huamchhung kawngpuiah lirthei leh bungrua dah phal a ni lo, a ti.
Aizawl thenkhata lirthei tlan dan tur ruahman thar
