Aizawl tlaklam veng pawh tur
kawngpui siam tum dan enfiah
Aizawl West-II bialtu MLA, minister Lalnghinglova Hmar chuan Thawhlehni khan Tuikual lui hrula kawngpui, ‘Aizawl West Outlet’ siam hna thawh tur chu a hmunah a endik a, khawtlang hruaitute leh kawng kal dan tur riruang duangtu ARDECO Design Build leh contractor-te nen harsatna awm thei chinfel dan tur, tha leh chak taka thawh theih dan tur an sawiho.
Aizawl West Outlet project thil tum sawiin minister chuan, Aizawl tlaklam venga veng mawngping ni thin, Tuikual South (A), Pu Lalrina turning point-a, laklawh taka motor kawngpui tawp tawp mai chu, he project kaltlang hian Dinthar Veng Ebenezer Hospital bula chhuak turin kawngpui siam a ni dawn tih a sawi a. Kawngpui hi Tuikual lui kam dungzuia siam tur niin, Tuikual ‘N’, Tuikual ‘S’, Dinthar Veng chuanhnuaia awmte leh Aizawl tlak lam venga awmte tan, inkalpawhna tangkai tak a ni dawn tih a sawi a ni.
“Storm Drain Project (tuiluankawr siam hna) nena tangkawpin kawngpui hi siam a ni dawn a. Rikrum thil, chhiatni thatni, faina leh hriselna bakah bawlhhlawh sawngbawl leh nitin khawsak kawngah mipui tan a tangkai hle dawn a ni,” a ti. Zawhfel a nih hunah chuan Aizawl khawpui traffic jam pawhin nasa takin a ziaawm phah theih a beiseiawm tih a sawi bawk.
Aizawl West Outlet Project hi SASCI hnuaia khawpui tuiluankawr siam hna ‘Storm Drain Project’ nena tangkawpa thawh tur niin, km. 1.6 a thui, feet 12-a zau kawngpui bakah feet 4-a zau foothpath awm thei tura ruahman a ni a, tuiluankawr RCC feet 8-a zau siam tur niin, he hna atan hian belhkhawmin cheng vaibelchhe 30 ruahman a ni.
Aizawl tlaklam veng pawh tur kawngpui siam tum dan enfiah
