Daily Newspaper

Aizawl veng 5-a endik runpuiah 2.75% in hri kai

39

Mizoram sawrkarin Aizawl khawpui huamchhunga inkharkhip bur a neih laia Covid-19 kai endik runpuiah mi 4,063 zinga 112, za zela 2.75-in hri an kai.

Thawhlehnia Aizawla endik runpui neihah Saron Veng-ah mi 798 sample endik atangin Covid kai 13 hmuhchhuah an ni a. An ni hi endik chhunzawm tum rihna a awm lo nia thu dawn a ni. Electric Vengah sample 212 endik atangin hri kai 6 hmuhchhuah an ni a, anni pawh endik chhunzawm zel tumna a awm thu dawn a ni lo.

Chhinga Vengah sample 464 endik niin hri kai hmuhchhuah 21 an awm a, anni hi vawiin lamah endik runpui hi neih chhunzawm tum a ni. Armed Veng South-ah mi 726 endik a ni a, hri kai 24 hmuhchhuah an ni a; vawiin hian neih chhunzawm tum a ni. An ni hi RT-PCR leh Rapid Antigen Test atangin nimin vek khan hri kai 22 hmuhchhuah an ni bawk.

Bethlehem Vengthlangah mi 1335 endik atangin hri kai hmuhchhuah 31 an awm a. Anni hi YMA section 6 awmah section 2 an zo hman lo deuh a, vawiina chhunzawm tur a ni. Tuirialah mi 537 endik atangin hri kai 17 hmuhchhuah an ni a, an ni hi endik chhunzawm zel tura sawi a ni.

Health minister Dr R. Lalthangliana leh I&PR minister Pu Lalruatkima te chuan nimin khan Aizawl khawpui leh a chhehvel veng/khua 5-a Covid kai leh kai loh sample test runpui neihna hmun – Tuirial, Bethlehem Vengthlang, Armed Veng South, Chhinga Veng, Saron Veng leh Electric Veng te an tlawh. Test kalpui dan leh Covid kaite enkawl tur hmunhma an neih dan te, khawtlang dinhmun leh harsatna an neihte an enpui a ni.

A ni 2-naah – Venghlui, Salem, ITI Veng, Bawngkawn leh Ramthar Veng ah endik runpui hi an chhunzawm anga; a ni 3-naah – Sairang, Phuchawng, Rangvamual leh Sihhmui ah neih a ni ang. A ni 4-naah Tuikual South, Tuikual North, Dinthar, Dawrpui Vengthar, Vaivakawn leh Zuangtui a ni anga; a ni 5-naah Serial Test neih a ni ang.

He ruahmanna hi endik runpuiah hian buaipui tur hrang hrang a tam avangin ni khata zawh tura ruahman hi zawh hman a nih loh pawhin a tul anga siksawi zel tum a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy