Aizawl veng tinah nasa takin Congress party kaithoah inngai

Aizawl Municipal Corporation inthlanpui neih zawh takah Congress party chuan nasa takin Aizawl veng tinah an party kaihthawhin a awm tih an sawi.
MPCC president Lal Thanzara chuan thuchah siamin, AMC inthlan tluang taka hman tirtu Pathian hnenah lawmthu an sawi a. Inthlan buatsaihtu State Election Commission leh thawktu zawng zawng, Mizoram People’s Forum chungah leh thahnemngai taka vote thlaktute chungah MPCC chuan lawmthu a sawi tih a sawi. A bikin, Congress candidate-te leh anmahni khawngaiha vote petute, an tlin theihnana hah taka thawktute chungah lawmthu an sawi tih a sawi bawk.
Congress Thalai Hqrs. chuan thuchhuah siamin, Pathian hruaina in tluang taka AMC inthlan neih a ni chu lawmawm a tih thu a sawi a. Congress candidate-te an chhuang a, an party aiawhte duhsaka vote-tu hnenah lawmthu a sawi tih a sawi.
‘Ward thenkhatah MPF-in a khak ngai hial khawpa dan palzutna a thleng erawh pawi kan tiin thleng zui tawh lo se kan duh a ni,’ a ti.
Inthlan buatsaihtu State Election Commission leh inthlan buaipuitu sawrkar mi leh sate, Mizoram People’s Forum leh vote thlaktute chungah lawmthu a sawi bawk.
‘Kumin AMC inthlanah Aizawl veng tinah nasa takin Congress party kaihthawh a ni a, mi tam takin Congress-ah beiseina thar neia an rawn zawm hmuh hian, Congress kaihhruai Mizoram sawrkar a piang leh thuai dawn tih a chiang a. Sawrkar tha leh rintlak, mitin ban phak, kalphung dik, chhungtin fairel bel thleng phak sawrkar siam tura theihtawp chhuahho zel turin Mizoram mipui kan sawm a ni,’ Congress Thalai thuchhuah chuan a ti.