Aizawla inkalpawhna tur ruahmante enfiah
Mizoram sawrkarin Asian Development Bank (ADB) hnuaia Project Readiness Financing (PRF) hmanga Aizawl Sustainable Urban Transport Project (ASUTP) a kalpui mekah ADB Recon and PRF Mission Visit chu May 2-5 chhunga neih a ni dawn a, ADB hotu pathum an rawn kal.
May 2 zing khan site visit nei tanin, Kulikawn to Vaivakawn, Chanmari kawn, ATC Durtlang leh Ngaizel City Bus Terminal an tlawh a. Chawhnu lamah UD&PA secretary, ASUTP PMU project director Lalmalsawma Pachuau, UD&PA director ASUTP PMU addl.PD H Lianzela te kaihhruaiin an thukhawm.
He hunah hian ADB atangin an rawn kal chhan leh an tum an sawifiah a. PRF hmasawn dan thlir hoin, an hmuh dan an sawi a. PRF hnuaia sub-project hrang hrang – technical leh financial-a a hlawhtlin theih dan turte sawiho a ni. ADB-in loan a pek dawna an kalpui dan tlangpui sawi a ni a. PRF loan a zawh huna ADB atanga loan lakna tur project hrang hrang atana inbuatsaih dante sawi a ni bawk.
Vawiin, May 3 hian site visit an neih chhunzawm anga, ropeway alignments – Zemabawk Cancer Hospital – Ramhlun Sports Complex – McDonald Hill Zarkawt – Assam Rifles ram luah – Chhangurkawn – Chawlhhmun Solomon Temple – MZU bakah MZU – Lawipu – MINECO – PU College – Rajiv Gandhi Stadium Mualpui; MZU – Sakawrtuichhun – Sairang Bus leh Truck Terminal atana ruahmanna hmun Sairang /Sihhmui, Bung Bangla, Ngaizel/ Hlimen leh Zemabawk te an en ang. May 4 pawh hian site visit an la nei leh dawn a ni.
Aizawla inkalpawhna tur ruahmante enfiah
