Aizawla ropeway siam theih dan sawikhawm
Mizoram larsap Gen. Vijay Kumar Singh (Retd) chuan Thawhlehni khan Ministry of Road Transport & Highways (MoRTH), National Highways Logistics Management Limited leh Mizoram Urban Development & Poverty Alleviation department hotute chu Raj Bhavan-ah kawmin sawrkar laipui ‘National Ropeways Development Programme – Parvatmala Pariyojana’ hmanga Mizorama ropeway siam theih dan a sawipui.
Larsap chuan khawpui tawt zelah ruahmanna hrang hrang neih a pawimawh a, hma lak ran a ngai tih a sawi a. Tun dinhmunah Aizawlah hmun awl a tam tawh loh avangin sawrkar project kalpui turin Aizawl chauh melh loin, hmun dang pawh ngaihven tel a tul tih a sawi.
Inkalpawhna leh mipui veivahna chu ngaihven hmasak ngai a ni, tiin, tlangrama chengte inkalpawhna atana sawrkar laipui project tha tak Parvatmala chu tangkai taka hman a nih theihnan hmelhriat a, chhawr tangkai a tul tih a sawi a. Line department dangte nen pawha inrawntlanga he scheme hi chhawr tangkai dan ngaihtuah tlan a tul tih a sawi bawk.
MoRTH addl. secretary Vinay Kumar chuan Mizorama ropeway project kalpui turin theihtawp chhuahpui an inhuam tih a sawi a. Parvatmala chu tlangrama inkalpawhna siamna atan project tangkai a ni a, hemi atanga revenue zaa 90 chu khawtual hmasawnna thawhna atan hman theih a ni tih a sawi a ni.
UD&PA secretary Lalmalsawma Pachuau chuan powerpoint presentation hmangin Aizawl leh a chhehvela ropeway corridor din tura ruahmanna siam, ‘Ropeways under Aizawl Sustainable Urban Transport Project’ a sawifiah a ni.
Aizawl leh a chhehvel square km. 280 azauah khawpui tawt tihziaawmnan Comprehensive Mobility Plan siam a ni a, hei hian project hrang hrang – ropeway, kea kalna siam belh, Regional Truck Terminal, Bus & Truck Terminal, bus service tha leh tam zawk neih dan leh a dangte a huam a ni.
Aizawla ropeway siam theih dan sawikhawm
