Aizawla tui luankawr zawng zawng chu khuh vek a, tui luankawr lian zawka luankhawm tir a,. khawpui pawna fel taka luanchhuah tir tum a ni tih UD&PA minister K Sapdanga chuan a sawi.
UD&PA Department huaihawtin Aizawl Faina Hmathlir (Comprehensive Plan for Municipal Waste in Aizawl) sawiho a ni a. Hmanpuitu UD&PA minister K Sapdanga chuan Aizawl khawpui tui luankawr zawng zawng khuhfai vek a, awmze nei taka kan tuichhia chu tui luankawr té zawka luankhawm tir a, tuiluankawr té zawkte chu a lian zawka fin tir leh a, felfai taka khawpui pawn lama luankhawm tir tum a ni tih a sawi.
Heng tui luankawr khuhna chungah hian a remchanna piangah ke leh lirthei kal theihna tur kawng/ step siam tum a ni a, hemi tan hian sum tam tak mamawh a ni a. UD&PA department official ten an buaipui mek tih sawiin, Aizawl khawpui chu khawpui nghet leh fai a nih theih nan mitinin mahni hmazawn theuha hma la turin a sawm.
“Mizote hian fai kan tlin a, ka rilru pawhin a duh. Chu chu Biate leh Ngopa enin a lang mai. Chutihrualin fai turin kan rilru kan sawizawi tawk loa, fai tur chuan kan rilru a fai hmasak phawt a ngai. Kan rilru a fai chuan kan in leh lo, kan kawtthler leh kan tui lunkawr pawh a lo fai mai dawn a ni,” a ti.
Fai tura inngen leh inzirtir zawm zel chungin, khauh takin dan leh thupek hmanga kan kawtthler, in leh a bul vel, kan tui luankawr leh boruak tihfai a ni tawh dawn tih K Sapdanga hian a sawi a. Ram changkang leh fai kan tihte chu dan leh thupek lekkawhna kawngah an kal na em em a. Singapore fai chhan pawh khauh taka dan an lekkawh vang a ni tih a sawi.
“Tunhma chuan khawlaiah bawlhhlawh kan hmuh chuan rilruah YMA a lang a, AMC awm chinah chuan AMC a lang thin. Tunah chuan khawlaia bawlhhlawh kan hmuh chuan mahni inenchiang ila, zah nachang hre tawh ang u,” a ti.
Aizawl mayor Lalrinenga Sailo pawhin, foreign-a kan kalin an faina dan kan zawmtha in kan fai thei viau si a, engah nge kan ram chhungah kan fai theih loh bik, tia sawiin, “A bal sa tibal belchhahtu niloin, kei tal hian ka han tifai ange, tih rilru mitin hian nghet takin pu ila, fai turin tumruh bawk ila, kan fai loh chhan tur a awm lo,” a ti. AMC a din atangin YMA pawhin faina lamah a pa-pek deuh ta nge, nidanga faina hnatlang ngawrh taka neih thin ang a awm meuh lo nia a lan thu sawiin, YMA chu theihtawp chhuaha faina kawnga sawrkar tawiawm zel turin a ngen tih a sawi a ni.
Sawihonaah hian fakina kawnga AMC, UD&PA leh pawl (Save the Riparian & Aizawl City Local Council Association) hmalakna leh bawlhhlawh sawngbawlna lama ruahmanna awmte sawi a ni a. Hemi kaihhnawiha dan awm leh mumal zawka kalpui zel dan tur ruahmanna sawi a ni bawk.
Resolution – UD&PA minister, Aizawl mayor leh corporator-te; UD&PA, AMC, ASCL hnuaia official-te; Aizawl Municipal huamchhunga local council leh Local Sanitation Committee aiawhte chuan, Aizawl khawpui hi India rama khawpui fai ber a nih theih nana ruahmanna – ‘Comprehensive Plan for Municipal Waste Management in Aizawl’ hi tha kan tiin, kan pawm a. Hmachhawp hrang hrang tihlawhtling turin kan theihna zawn theuhah theihtawp kan chhuah ang. He ruahmanna tihlawhtling tur hian Aizawl mipui zawng zawng, kohhran, NGO hrang hrang thawhpuiah kan sawm a ni, tih an pass.
Aizawla tuiluankawr khuh vek kan tum – UD&PA minister
