Sawrkar laipui hnuaia National Livestock Mission (NLM) deputy commissioner Dr Lipi Sariwal chuan May 2-4 chhung khan NLM hnuaia vawkvulh tanpuina pekchhuah chungchangah hmalakna a hmuna enin Mizoram a rawn tlawh.
Deputy commissioner hian NLM hnuaia entrepreneur-te farm, Lengpui leh Dihmunzawl ami a en a, entrepreneur-te hmalakna chu fakin NLM-in a tum ber chu, ran chi tha chhawmnun leh tih darh zel a ni tih a sawi a. Farm a tlawhna ten tha taka hma an lak bakah loan leh subsidy dik taka an hman avangin lawmawm a tih thu a sawi. Farm tih changtlun zel dan tur a sawipui nghal a ni.
AH & Vety department hotute nen an inkawmnaah Dr Lipi Sariwal chuan, NLM hmalakna department-in theihtawp chhuaha a kalpui avangin lawmthu a hrilh a. A tam thei ang berin he hamthatna hi an dawn theih a duhpui bakah darhzau zawka NLM chungchanga hma lak sak turin a chah. Entrepreneur-te tana training buatsaih leh tha zawka farm an enkawl dan tur an sawi ho bawk.
Vawkvulh lama tanpuina dawngtute nen hian inkhawm khawm nghalin, entrepreneurs mi 40 vel an tel a. An harsatna thlen zinga a lian ber, Mizorama ranchaw man sang lutuk tih ziaawm dan tur central lam hotute a lo sawipui tur thu a hrilh a ni.
National Livestock Mission hnuaiah hian vawk vulh, ar vulh leh kel vulh tanpuina loan leh subsidy pekchhuah reng a ni a. Tun dinhmunah diltu mi 174 awm tawhin, mi 30 hnenah 1st instalment subsidy pek a ni tawh.
Aizawla vawk farm siamtute NLM hotunu in a enpui
