Aizawla zirtirtu sawnchhuahin
school dang nghawng kual tam
Lawngtlai district Govt Modern High School Lungtian-a zirtirtu pakhat Aizawla sawn avangin school dang a nghawng nasa hle a, lungawilo hnuhnung ber chu Parva niin, an zirtirtu transfer order sut turin sawrkar an phut.
Tarlan tawh angin Govt Modern H/S Lungtian-a mathematics zirtirtu (regular) chu Aizawlah sawn a ni a, amah thlakna atan Govt. H/S Tlabung-a mathematics zirtirtu (regular) chu Lungtianah hian sawn turin order tihchhuah a ni.
Tlabung khawtlang hian an zirtirtu hi chhuah phal lohin sawrkar lakah lungawiloh an lantir a, sawrkar hian a sawnchhuak ta lo a ni. Lungtian hian thlaktu nei loa an khaw zirtirtu sawnchhuah hi dah let emaw a thlaktu emaw pe turin sawrkar an kar ve thung a, sawrkar hian Lawngtlai district ami tho Parva atangin zirtirtu hi dahna order a tichhuak ta a ni.
Join Action Committee Parva chuan Govt Parva H/S zirtirtu hi a aiawhtu tur dah loa sawn hi a rang thei ang bera order sut turin sawrkar an ngen.
‘Kum tam tak hnua regular teacher kan neih ve chhun transfer a ni hi khawtlang hruaituten kan pawm loa, a transfer order hi sut leh a nih hma chu kan khua a chhuahsan lohna turin dan kan tum a. Zirna in zawng zawng pawh tiamchin awm loin khar nghal a ni,’ Parva JAC chuan an ti.
Zirtirtu indaih lohna hi NGO leh pawl hrang hrangten sawrkar thuneitute hnenah vawi tam an lo thlen tawh a. Middle school atangin Chakma pahnih attached-in dah an ni a, high school-ah regular teacher pangngai dah tur leh mathematics leh science zirtirtu dah tura thuneit te hnenah ngen thin mah se, hmalakna a awm ngai lo tih an sawi bawk.
Headmaster hi Chawngte-a awm niin, school a kal ngai loa, District Education Office-ah pawh an thlen a, hmalakna a awm ngai loa, zirtirtu pathumin school hi an enkawl hram hram niin an sawi a ni.
Aizawla zirtirtu sawnchhuahin school dang nghawng kual tam
