Inrinni kha India ram Independence Day a ni a, Mizoram hmun hrang hrangah lawm niin, he ni lawmna lian ber Aizawlah chief minister hovin Lammualah hun hman a ni.Mizoram chief minister Lalduhoma’n India hnam puanzar a pawt pharh a, parade contingent 27-te chibai bukna a chhanglet a, lawmman chi hrang hrang a sem bawk.
Chief minister hian thu a sawi a, Mizoram hmasawnna langsarte a sawi a, Mizoram economy siamthatna tura hmalakna lian ber chu Bana Kaih Scheme a ni tih a sawi.
“Mizoram Bana Kaih (Handholding) Scheme chu Mizoram economy siamthatna tura kan hmalakna lian ber a ni a. Kan progress partner-te nena sum leh paia thawhhona mai piah lamah, an thiamna tihpun kawngahte hma kan la a; eizawnna tha zawk kawhhmuhin, ram hmasawn nan hma kan la mek a ni,” a ti.
Mizoram Bana Kaih Venture Capital Fund siam a nih thu a sawi a, cheng vaibelchhe 20 corpus fund dah niin, mahni kea din tumte’n bul an tan theihna tura puihna tur venture capital fund Mizoramin a siam vawi khatna a ni tiin a sawi.
Investment Policy, 2025 neih thar a nih thu a sawi a, “Mizorama kalpui theih chi Centrally Sponsored Scheme (CSS) zawng zawng chu SNA SPARSH-ah kan dahlut vek tawh a. Hun tiam chhunga tha taka kan kalpui avangin sorkar laipui chuan hmalak that lawmman (incentive) cheng vaibelchhe 350 min pe,” a ti.
“Chhiah lak dan siamthatna pawhin rah tha tak a chhuah mek a. Kum 2025–2026 chhunga kan chhiah tlingkhawm chu cheng vaibelchhe 1,278.55 zet a tling a, 3.35% atangin 11.20%-ah a pung a ni. GST 2.0 hian chhiah lakkhawm dan felfai leh zau zawk min siamsak a, hei hian kan ram tana hmasawnna hna kan thawh zelna turah min tanpui ang,” tiin chhiah chungchang a sawi.
Sorkar office 45-in e-office an hmang tawh tih a sawi a, sorkar inrelbawlnaa lungawi lohna emaw rawtna emaw thlen theihna CPGRAMS-a case lut 90% chin fel a ni a, Mipui Aw-a lut 91% chin fel a ni tih te a sawi.
“Hmarchhak state-te zingah SMAVITA Property Card semchhuak hmasa ber kan ni hi kan chhuang hle,” a ti a, “NABARD RIDF leh SASCI hmangin hmasawnna ruhrel tam tak kan din mek a, cheng vaibelchhe 61 sengin link road leh PCC pavement kan siam a. Leitha (fertilizer) kan mamawh khawp a awm reng theih nan a tawlhruk chingte tihrem tumin chak takin hma kan la,” a ti bawk.
Thlai thar hralh chungchang a sawi a, sawhthing lei nan 2026-ah hian support price cheng vaibelchhe 22 vel pek a nih tawh thu sawii, Mizoram chu Ginger Capital of India-ah puan a nih thu a sawi.
2025-ah off-season tomato metric ton 2,770.5 leh zikhlum metric ton 3,712.64 tharchhuah a nih thu leh kuthnathawktute’n cheng vaibelchhe 40 vel zet an lei tih te a sawi
Mizoram Water Information and Governance Bill, 2026 pawm a nih tawh thu a sawi a, “MGNREGA thlakna VB-GRAM (G) hmang tura inpeih fel hmasa ber state zingah tel a, kan bultanna tur sum pawh cheng vaibelchhe 611.65 dah a ni,” tiin thingtlang mite inhlawhna chungchang a sawi.
“Buhfai lama harsatna kan tawh loh nan Mizoram State Special Ration Package hmangin tan kan la a. He package hi chhungkaw 29,000-in an chhawr tangkai tawh a ni. Kum 2026–27 atan monsoon stock buhfai kan dah khawl tawh a. Stock enkawlna tha zawk kan siam avangin sorkar sum luangral tur cheng vaibelchhe 73.24 vêl zet kan hum a ni,” tiin buhfai sem chungchang a sawi.
Kawlphetha lama hnathawh a sawi a, megawatt 10 pe chhuak thei Thenzawl Solar Plant chu hawn a nih thu a sawi a, “Megawatt 24 pe chhuak thei tur Tuirini Small Hydel Project pawh kan (phek hma zawmna…)
thawk tan a. Tuirini Project hi kan zawh hunah chuan kum tin kawlphetha unit million 64 vêl a pechhuak thei dawn a ni,” a ti.
“Khualzin lo lut an pung nasa hle. Tourism-ah tan kan la zel a, kan hmathlir tam tak zingah India thlasik khawpui Winter Capital of India atana Aizawl siam tumna a tel,” tiin tourism lam a sawi.
Ruihhlo ngai enkawltuten rualkhai leh mumal zawka inenkawlna an kalpui theih nan Mizoram Drug Treatment-cum-Rehabilitation Accreditation System chu duan a nih thu a sawi a, Hulhliap Short-Stay Centre siam a nih thu sawiin, kohhran leh tlawmngai pawlte nen thawkhoin ruihhlo ngaite enkawl a nih thu a sawi.
“Infiamna lamah pawh Bana Kaih Empowering Mizoram Sports (EMS) kan kalpui mek a. Olympic Games 2036 lo awm turah Mizo infiammite an tel theihna tur thlirin talent nei tha naupangte thlang chhuakin kan kaihruai mek. Nippon Sports Science University, Japan-te nen tangkawpin EMS digital portal kan siam a; hei bakah hian sports discipline 8 thlang chhuakin a bika training buatsaih a ni,” tiin infiamna lama hmalakna chungchang a sawi.
“MUHCS kalpui mekah hian April 2025 atanga April 2026 chhungin dam lo inenkawlna senso cheng vaibelchhe 178.58 pek chhuah a ni,” tiin MUHCS chungchang a sawi.
“Green India Mission, Project Tiger, Project Elephant leh CAMPA hmangtein hma kan la a; kumin chhung khan ram hectare 1800 a zauah thing kan phun a ni,” tiin ramngaw humhalhna lam a sawi bawk.
Chief minister hian State Award to Teachers a sem a, Lalrinmawia Pachuau, Headmaster, PM Shri Govt. Kawrthah, PS-I te, H Zohmingthanga, Headmaster, Cheural Sianglairun M/S te, Lalhmunsiami Fanai, Headmaster, Govt. GM H/S, Champhai te, C Lalhmingmuana, Principal, Baptist HSS, Lunglei te’n an dawng.
Police chawimawina a sem bawk a, Lalmuanthangi, Dy. SP (M) – President’s Medal for Distinguished Service, Seju P. Kuruvilla, IPS, IGP (ANTF) – Medal for Meritorious Service, Lalruatsanga Tochhawng, MPS, Sr. SP, Wireless – Medal for Meritorious Service, MC lalhmingthanga, Inspector – Medal for Meritorious Service, Fredy Lalramthara, Inspector – Governor’s Gold Medal, Melody Lalmuanpuii, Inspector – Governor’s Gold Medal, John Vanlalruata Sailo, Sub Inspector, Cyber Crime – Governor’s Gold Medal, C Zodinpuii, Sub Inspector, END – Governor’s Gold Medal, Lalsangvunga Sailo, Asst. Sub. Inspector, END – Governor’s Gold Medal, C Lalrinpuia, Havilder, 1 Bn MAP – Governor’s Gold Medal, C Lalfakzuala, Hon Head Constable, CID (SB) – Governor’s Gold Medal, C Vanlalrosanga, Constable, Anti-Narcotics Squad – Governor’s Gold Medal, Israela, Constable, Anti- Narcotics Squad, Aizawl – Governor’s Gold Medal, H Laldingliani, Constable, END, Kolasib – Governor’s Gold Medal, S Zahmingliana, Constable, END, Mamit – Governor’s Gold Medal, R Lalhmangaiha, Constable, 5th IR Bn, Mary Lalthazuali Hnamte, Sub Inspector, Aizawl DEF – Governor’s Silver Medal, Jonathan Lalbiakkima, Asst. Sub- Inspector, Champhai DEF – Governor’s Silver Medal, Lalneihsanga, Asst. Sub Inspector, Khawzawl DEF – Governor’s Silver Medal, Lalsawma, Head Constable, END, Champhai District – Governor’s Silver Medal te’n an dawng.
Parade lawmman a sem bawk a, armed contingent-ah pakhatna 34 Assam Rifles, pahnihna 5th IR Battalion, pathumna 1st Battalion, MAP an ni. Unarmed contingent-ah pakhatna Sainik School Chhingchhip, pahnihna 20 Mizo Battalion NCC, pathumna 1st Battalion MAP English Medium School Scout & Guide an ni. School Contingent-ah pakhatna Mt. Carmel School, pahnihna Synod HSS, pathumna St. Paul HSS an ni. Parade Commander hi B Lalthakima, MPS, Dy. SP a ni a, 2nd Commander hi Zodinsanga Khiangte, MPS, Dy. SP a ni.
Chhunah Mizoram Governor General (Dr) Vijay Kumar Singh, PVSM, AVSM, YSM (Retd) chuan Lok Bhavan-ah Governor’s At Home a buatsaih a. He hunah hian Chief Minister leh sawm bik mi pawimawh ten zalenna champha lawmna pualin thingpui inhona hun an hmang a ni.
Aizawlah Independence Day lawm Hmalakna lian ber CM-in sawi
