May 12 kha International Nurses Day a ni a, khawvel hmun hrang hrangah hman a ni. Mizoramah pawh hman a ni a, Aizawla a hmanna pui ber chu Civil Hospital Aizawl-ah hman a ni. Hetihlai hian Mizo nurse, India ram chhung hmun dang leh rampawna thawk mek mi 800 chuang an awm nia chhinchhiah a ni. Civil Hospital Aizawl-a hmanpuitu Health & Family Welfare Directorate of Nursing deputy director Mary Ramte Pachuau chuan phur tak leh hlim taka kan thawh chuan kan damlo enkawlte ah damna kan pe thei tih a sawi a. Health care leh ram economy-ah nurse-ten pawimawhna an nei tih sawiin, “Ramdangah Mizo nurse hnathawk mi 111 an awm mek a, India ram state dangah mi 760 chuang awm mekin, an ni hian ram tan investment nasa tak an pe a ni,” a ti.
Nurse mamawhna a sang zel a. Natna inkai chhawn theih loh (non communicable disease) a pun zel avangin damlo enkawltu mamawhna a sang a, mihring dam chen a sei tual tual chuan nurse mamawhna a tisang bawk a, investment tha ber a ni tih Nursing hotu hian a sawi. “Mizo nurse-te hi kan tha a ni tih hrethar lehin, tanhona tha lehzual nei ang u. Damlote tan a tha ber pechhuak turin tan la ang u,” a ti. Mizoramah registered nurse sang 5500 chuang an awm tih a sawi.
Civil Hospital Aizawl nursing superintendent Lalrintluangi chuan, nitina damlo enkawla thawk ve reng siin, an hnathawhah an hlim em, nuam ti takin an thawk em tih a pawimawh thu a sawi. Nurse-te chu hnathawhna hmunah harsatna tawk ve thei an ni a, chhungkaw enkawlnaa buai tak chung pawha tang fan fan thei an ni tih a sawi bawk.
“Health care worker zaa 24-ten an hnathawhna kawngah tihbuai an tawk thin a. Covid len lai phei kha chuan zaa 70-ah a kai a ni,” a ti.
Nitina damlo enkawl an ni a, an damlo enkawlte an him tur a ni tih nursing superintendent hian a sawi. “Injection pek sual, thildang tih sual palh vangin damlote nunna chan thei an ni a, hnathawhah inpe thar lehin kan hnathawhna hmun nuam ti ila, hlim taka thawk turin tan hona tha tak nei ang u,” a ti.
Aizawlah Nurse-te Ni hmang State pawna thawk mek 800+
