Assam Cultural Society Mizoram bultumin Inrinni khan Aizawlah Rongali Bihu (Assamese New Year) hman a ni.
Hmanpuitu chief minister Lalduhoma chuan, hnam tinin tobul kan nei theuh a, hnam nun zemawi leh tihdan phung tha tak tak kan neih, pi leh pute atanga tihdan tha leh hnam nun zemawi tak tak chhawnnun zel chu a mawi a, thangtharte mawhphurhna pawimawh a ni, tiin a sawi.
Mizoram cheng Assam Cultural Society-in Assamese hnamzia vawnghim a, Rongali Bihu an lawm thin chu an hmalakna fakawm a tih thu a sawi a. British awpna hnuaiah Assam huamchhungah Mizote hun rei tak kan bet a, chumi hnuah district council neiin state hrang kan nei chho ta zel a. Ram inthenawm kan nih angin kawng tinrengah kan inmamawh tawn a, kan tanho a ngai a, inrem taka hmasawnna rahbi kan rah chhoh tlan zel a tul hle tih Lalduhoma hian a sawi.
“Kumin kumtir lama Assam chief minister Himanta Biswa Sharma nen kan inkawmnaah pawh ramria boruak ralmuang awmtir leh harsatna siam lo zawng zela awm kan remti dun a. Chhan hrang hrang avangin Assamese engemawzat Mizoramah in awm mek a, thlamuang tak leh hlim taka in awm kan beisei. In hun remchangah fangkual ula, kan nunphung leh hmunhluite tlawh ula, inunauna leh inhriatpawh tawnna tha siam zel ang u,” a ti.
Assam Cultural Society Mizoram president Dr PC Kalita chuan Mizoramah Assamese 500 vel an cheng mek a, nuam na ti hle tih a sawi.
Bihu lam leh zai, Assamese hnamzia pholang thei thilte entir a nih bakah Nepali lam leh Cheraw entir a ni.
Aizawlah Rongali Bihu hmang
