Aizawl khawpui him leh thianghlim zawk neihna atan sawrkar chuan tuiluankawr tha leh felfai siam beihpui thlakin ‘Mission Urban Drain’ a kalpui dawn a, kum kal mek atanga tanin kum 2033-a zawhfel tuma ruahman a ni. Mission Urban Drain hi sawrkar kum kalta atanga ruahmanna awm tan a ni a, Aizawl khawpui tuiluankawr tin, a lian leh a te nen lam, mumal taka a luan dan tur siama inruahman chhung hun a duh tam avangin sawrkar kum kal mek atangin a hna hi tan tak tak theih chauh tur a i. Chutihlaiin, hmun nghet lo zual, kum dangah pawh harsatna awm thinna chu thawh hmasakah neiin hna a kal mek tawh a ni.
Khawpui chhunga tuiluankawr zawng zawng mumal taka kawrpuia luan luh tir vek tum niin, a senso hi SASCI hnuaiah cheng vaibelchhe 61.76 hmangin hmun 26 ah thawh mek a ni a, cheng vaibelchhe 35 dang dilna tur DPR buatsaih mek a ni bawk.
Nilainia he Mission khuhhawnnaah UD&PA minister K Sapdanga chuan, Aizawl khawpui hi leimin leh leitawlh lakah engtin nge kan venhim anga, faina kawngah engtin nge hma kan sawn anga, thianghlimna leh hriselna kawngah engtin nge kan tihhmasawn theih ang tih beihpui thlakna a ni tih a sawi.
“Aizawl khawpuiin kum telin leimin kan tuar nasa tial tialin a hriat a, hmun thenkhatah chuan a mual muala che pawh a awm. A chhan lian ber nia mithiamten an ngaih chu, tuiluankawr awm that tawk loh vang a ni. Kan drain neih chhun hi hmun tam takah bawlhhlawhin a hnawh a, ruahtui tla hmasa ber atangin tuikawr atanga tuihawk lo luangliamin khawlaiah bawlhhlawh a vawrh chhuak a, lirthei veivak thlengin a tibuai thin. He harsatna sutkian hi Mission Urban Drain tum chu a ni,” a ti.
Kawrpui lian zual chu UD&PA leh DM&R department-in bitum se, kawr tenau zawk chu MLA leh corporator-ten bitum se. Khawlaia fur tuihawk luang darh mai mai thin luankhawmna tur luankawr kan siam tam poh leh leimin leh lei tawlh lakah kan chhan theih beisei a ni, tiin, UD&PA, DM&R, AMC, Aizawl MLA leh corporator bakah local council, tlawmngai pawl leh mipui an tanrual chuan, he suangtuahna hi a takah an chantir theih an ring tih a sawi bawk.
1. UD&PA director Jacob Lalawmpuia’n Mission Urban Drain a sawifiah dan:
8 Khawpui chhunga tuiluankawr awm sa, hmun hrang hranga inzawm vek lo (missing links) mumal taka thlunzawm vek tum a ni.
8 Tuiluankawr hi chi thum – primary (storm drain lian), secondary (ward-level link drains) leh tertiary (in bulhnaia tuiluankawr tenau) a then a ni a. Heng siam dan tur pawh duansa a awm.
8 Tuiluankawr thar hi RCC-a siam tur niin, a remchanna hmunah RCC-a khuh (cover) a ni anga, hei hian kea kalna (pedestrian footpath) tha tak a siam dawn bakah thenkhatah chuan lirthei zawh theiha duan a ni ang.
8 GIS-based mapping hmangin Aizawl hmun hrang hranga tuiluanna tur uluk taka zirchian hnuah hna hi thawh a ni anga, lei chet/ min fo thin tawh dan atangin ngaihpawimawh hmasak neih a ni ang. MLA/ corporator te pawh hemi zulzui hian an bial chhunga hnathawh/ tuiluankawr siam dan lo inruahman lawk tura beisei leh ngen an ni.
2. Aizawl Smart City Ltd. Dy. CEO V Lalruatliana’n ‘Solid Waste Management Rules 2026’ a sawi dan:
8 He dan thar hian Solid Waste Management Rules 2016 thlakin, 2026 April 1 atang khan hman tan a ni.
8 He dan thar hian khawpui chhunga bawlhhlawh siam chhuah leh vawmkhawm danah, a thliarhran leh sawngbawl danah ruahmanna thar chipchiar takin a siam.
8 Bawlhhlawh siam chhuak tam, inkhawmpui leh mi tam tak chenna in ho ang chi tan an dil lawk emaw a hranpaa bawlhhlawh neih/siam man sumfai chawi emaw ngaihna ang chi siam a ni.
8 Dan thar hnuaiah hian bawlhhlawh hi chi 4-ah thliar hran tur a ni a. Dry waste – plastic, lehkha, thir leh hmannawn theih thildang; wet waste – eibang ningnawi leh tawih theih; domestic hazardous waste – hriau, damdawi bur leh battery ang chi; sanitary waste- diapers leh sanitary napkins angte a huam.
8 Dan thar hnuaiah hian bawlhhlawh a paihna hmuna paihlo hremna na tak a awm a, he dan bawhchhiate hrem tur sawrkar official ruatin hremna a lekkawh loh chuan anmahni official zawk pawh hrem an ni dawn.
Aizawlah tuiluankawr ruahmanna ‘Mission Urban Drain’ kalpui dawn
