Mizo nunah Inrinni hi vawksa lei ni a ni a, Chawlhni sa atana vawksa lei hun a ni. Tunlaiah chuan a hma angin a ni vak tawh lo a, tun hnai phei chu, hri vangin Inrinni-ah meuh pawh vawksa a hnawng a ni ber e.
Mizoramah vawk natna African Swine Fever (ASF) hri a leng a, hei vang hian mipuiin vawksa an thinhrik niin a lang. Vawksa hralh a tla lo a, vawk vulhtute leh a sattute tan phei chuan a manganthlak hle.
“Inrinni-ah hian a hma chuan vawk panga te, paruk te kan talh thin a, a chang phei chuan paruk pawh mipuiin an inchan lo hial thin. Tunah chuan pakhat kan talh pawhin kan hralh hlei thei lo a, kan hralh zawh chang chuan lawmawm tak a ni,” vawksa sat pakhat chuan a ti.
Aizawl bazar hlun Venghlui Bazar-ah chuan vawksa zawrhna dawhkan pakua a awm a, dawhkan pakaw thutchilhtute hian hri len hma chuan Inrinni-ah vawk 50 vel an talh thin. Inrinni liam taah khan dawhkan paruk an luah a, tlai dar 4 velah pawh an la ngah hlawm viau.
ASF hi kum hmasa lamah pawh a leng tawh a, Aizawla vawksa zuarte chuan kum hmasa aiin kuminah mipuiin an thinhrik zawk a, inhralh a har zawk an ti.
An sawi dan chuan, kum hmasaah khan chuan ASF hian Aizawl khawpui a luh chilh vak lo a, hrileng pawh kha Aizawl pawnah a nasa; kuminah chuan Aizawl khawpuiah a nasa a, hei vang hian mipuiin hri a leng tih an hre lehzual.
Aizawl khawpuia vawk vulhte pawh a nghawng a, a hma angin hralhna tur an hmuh loh bakah a man a tlahniam. A hmaa cheng sing thum man kha tunlai hian cheng sing hnih man te a ni a, a man hi tlawm mah se a sattute tan inhralh a har avangin lak vakna chhan tur a awm chuang lo.
Vawk vulhtute leh a sattute chuan an eizawnnain a tuar a, chhungkaw dinhmun a nghawng tih an sawi. Bazar-a talh lova veng chhunga talhte chuan chhungte leh thenrualte an bel a, vawksa ngah tak tak an awm lawi!
Aizawlah vawksa hnawng rih
