Aizawlah Zofate Inkhawmpui Lian nei
Zofa insuihkhawm leh rorelna pakhat hnuaia awm tura beitu Zo Reunification Organisation (ZORO) buatsaihin Zirtawpni khan Aizawlah Zofate Khawmpuilian neih a ni.
He hun hmanpuitu Information & Public Relations minister Lalruatkima chuan Zofate pumkhata kan awm theihna tura ZORO-in hma a la chu lawmawm a tih thu a sawi a. Pathianin Zofate chu hnam anga dinchhuah tir a, leilung hausakna ala thuhruk pawh a neitu tura a tihte hi a la phawrhchhuah tir ngei dawn, tiin, chumi tur erawh chuan Zofate inlungrual a, hruikhat vuanin, hnamdangte mit hmuhah pawh hnam inlungrual kan ni tih lantir a ngai tih a sawi. Hnam inpumkhat leh inlungrual kan nih zel theihna’n ZORO hmalakna kan thlawp a, a tul anga kan tawiawm a pawimawh tih a sawi a ni.
Zo hnam chi hrang hrangte hmun hrang hrangah awm darh mah ila, kan in hrereng a, kan inngaihsak thin tih Lalruatkima hian sawiin, tunhnaia Zohnahthlak unaute buaina tawh chungchangah pawh Mizorama raltlante sawrkar leh tlawmngai pawlten lo tuamhlawm a; Manipur atanga raltlan, UPSC exam hmachhawn turte tan pawh Aizawl Centre-a thlamuang taka an exam theihna’n ruahmanna siam a ni tih a sawi.
Mizo hnamzia tlawmngaihna chu tlawmngai pawl hrang hrang leh pawl dangten an chawinung zelin, manganna leh harsatna kan tawhin min ngaihsak a, kan hnam hmasawnna turin hma an la tih a sawi. “Zofate identity chu rinawmna, huaisenna leh tlawmngaihna a ni a, khawi hmunah pawh awm ila, kan hnam rohlu vawngnung zel turin Zohnahthlak zawng zawngten mawh kan phur a. Zofate inpumkhatna’n theihtawp chhuah a, ralthuam chelek loa kan thiamna leh finna hmanga tan lak zel a tul a ni,” a ti.
1988 May 19-21 chhung khan Champhaiah 1st World Zo Convention huaihawt a lo ni tawh a. He khawmpuia palai kalte hian ‘Zo’ tih chu hnam pumpui kohna atan an pawmtlang a, Zofa thendarha awm tawhte insuihkhawm leha rorelna pakhat hnuaia awm tura beih chu lungrual takin an pass. ZORO hruaitute hian ram hrang hrangte dawrin United Nations Organisation khawmpui hrang hrangah an lo tel tawh thin a, heng inkhawmpui lianah hian Zofate inpumkhatna thu an aupui a, ziakin vawitam an thlen tawh a ni.
Zofa Inkhawmpui Lianah hian MUP, MHIP, MSU, MZP leh CYMA aiawhten thu an sawi a. ZORO president R Sangkawia’n an pawl thiltum leh hmalak tawh dante, an hnathawh mek leh hmalak dan tur ruahmannate a sawi. Zo hnam chi peng hrang hrang aiawhte hnen atangin chibai bukna thu ngaihthlak a ni bawk.
Aizawlah Zofate Inkhawmpui Lian nei
![](https://theaizawlpost.org/wp-content/uploads/tap_logo-min-large.jpg)