Zomi Cultural Society Aizawl Joint Committee huaihawt, “Zomi Namni” vawi 75-na chu Thawhtanni khan Aizawlah hman a ni a, minister TJ Lalnuntluanga’n a hmanpui.
Minister chuan Zomi Namni hman a nih dan ropui a tih thu sawiin, hnam inpumkhatna chu a hlu a, inngeih taka awm leh tanrual chuan hnam chak takah min chhuah theih tih a sawi a ni. Mizoram sawrkarin hnam inpumkhatna a ngaihpawimawh avangin tun sawrkar a din phat atang khan kan chhehvela kan unaute nena inpawhna tha zawk neih theihna’n hma an la nghal tih sawiin, Transport department changtu minister a nihna anga hma a lakna zingah Zohnahthlakte nena inkalpawhna Aizawl leh Jampui (Tripura) MST bus service tlantir a nih thu leh, Aizawl leh Lamka (Manipur) bus service pawh hun reiloteah tihfel beisei a nih thu a sawi. Aizawl – Tahan bus service tura hmalakna erawh Myanmar ram a buai tak avangin External Affairs ministry lam hmalakna a thuanawp ta rih tih a sawi a ni.
Champhaiah Zomi Cultural Centre sak a nih theihna turin North Eastern Council kaltlangin project siam a ni tih a sawi bawk a. Fund hi hmuh mai theih tur niin, chief minister-in priority list-a a dahsak avangin lawmawm a tih thu a sawi.
Zomi Namni vawi 75-na lawmnaah hian Myanmar MP Thang Tuan Pau chu khualzahawm niin, hnam lam leh zai bakah malzai te ngaihthlak a ni.