India zalen kum 75 lawmna, ‘Azadi Ka Amrit Mahotsav (AKAM) Programme’ chu 2021 March 12 atang khan neih tan niin, kum hnih hnuah a kharna atan ‘Meri Maati Mera Desh’ (Ka Leilung, Ka Ram) programme’ chu India ram puma neih tura ruahman a ni.
Nilaini khan state huapin a khuhhawnna hman a ni a. Hmanpuitu chief secretary Dr Renu Sharma chuan Meri Maati Mera Desh chu campaign pawimawh tak, ram leh hnam inpumkhatna leh inlungrualna atana thil tih tul a ni, tiin, hemi atana theihtawp chhuah turin sawrkar hotute a ngen.
Meri Maati Mera Desh atan hian state level-a nodal officer chu Sports & Youth Services secretary Dr Lalrozama a ni a, urban level ah DC-te niin, rural level-ah BDO te an ni. Program hi khawpui veng tinah leh thingtlang khaw tinah August 9-15 chhung hman tur a ni.
Hman dan tur ruahman ang chuan, India ram zalenna sualtu nunna chante hriatrengna lung phun tur a ni a. Anmahni chenna khua/ vengah theuh an hming ziaka phun tur a ni. Ram tana intiam tharlehna lak tur a ni a. Khaw tin leh veng tinah thing tiak 75 phun tur a ni a, thing tiak hi tualto mi ngei a ni tur a ni. Zalenna sualtu mi huaisen thi /la damte, sipai leh police an duty laia nunna chante chawimawina hun hman tur a ni.
August 16-20 inkarah khaw tin veng tin atangin lei (mitti) lakkhawm a, Block Hqrs a kenkhawm tur a ni a. Hei hi hlum belah dahin India ram khawpui ber New Delhi-ah August 27&28 khian Block tin aiawh thalaiten an keng khawm ang. August 29&30 ah Kartavya Path-ah ceremonial program hi ram pum huapa siam leh a ni ang a, state sawrkar pawhin August 16 -25 inkarah hetiang program hi a huaihawt dawn a ni.
AKAM kharna atan hun hmang tan
