Portugal forward Cristiano Ronaldo chuan a club thar Al Nassr tana competitive debut a nghahchhuah zanin Pathianni khan goal a hlawhchhuak zo lo a, Saudi Pro League-ah a team chuan sikhat faiin Al Ettifaq Club an hneh zui ta tho.
Kum 37 mi Ronaldo hian thla hmasa mai khan Saudi Arabia club hi kum 2025 thleng atan a zawm a; a hlawh tur hi official-a puanzar ni lo mah se hetih chhung hian kumtin pound maktaduai 177 hlawh tur angin media lamin an tarlang chuai chuai a nih kha!
Sum hrawm lian lutuk nena an sengluh Ronaldo hian karliamta Ningani khan Riyadh All-Star XI tan exhibition match-ah Lionel Messi team Paris St-Germain a hmachhawn tawh a; kha game-ah khan goal hnih thun bawk mah se Messi team lakah 4-5-in Arab team an tlawm a; Pathianni zanah a club thar tan inelna hmachhawn tanin, goal a khung zo lo.
Brazilian midfielder Talisca goal hmanga Al Ettifaq an hnehna inkhelah hun pumin a khel a; an point thum hlawhchhuah hmangin a team chuan Saudi league-ah a sang ber an luah a, point khatin anmahni hnaihbertu Al Hilal an kalsan.
Manchester United, Juventus leh Real Madrid tana khel tawh Ronaldo hi Riyadh khawpuia Mrsool Park Stadiumchhung mipuiin an lawm hle a; a puala siam banner thahnem tak hmuh tur awmin, a pual hian amah ngaisangtu fans lamin thawm nasa tak an chhuah deuh reng bawk.
A Saudi Pro league debut-a goal thun nghal zo lo Ronaldo hian Old Trafford club tana a khelh lai nikum April thla khan fans kuta phone awm a benthlaksak avangin England FA chuan tualchhung game hnih khel thei lo turin a hrem a; United chhuahsan tawh mah se Fifa danah player hrem tuar chuan a khelhna club sawn mah se a club tharah pawh hremna chu a nung chhunzawm ang tih dan a awm a, he dan avang hian Saudi club a zawm hnuah match hnih a nghak zet a, Pathianni khan a club thar ber tan a inlan thei ta chauh a ni.
Paris St Germain laka friendly match goal hnih a thun avang pawhin league match-a bul a tan tum khan an superstar thar lakah Al Nassr chuan beiseina sang tak nei mah se club leh ram tan belhkhawma senior goal 800 chuang a thun tawh belhchhah turin goal lawm tur a nei zo lo.
Al Ettifaq game-ah Cristiano Ronaldo khan captain banhren a hreng a; a bultanna inkhelah goal sualchhuah ngei tumin a tlan tam a, mahse, a team-mate tharte’n ball tha an chhawpsak zo meuh lo a, tlarhma lamah a maltlat fo.
Portugal international hian penalty area kilsir atangin first half-ah goal a zawng a, mahse, a shot chu dansak niin, minute 19-ah Ettifaq defender vanga tlu nia ngaih theih a nih avangin penalty a ngiat a, a hlawhtling zo lo.
Darkar chanve an khel pel chiah tihah Brazilian forward Talisca chuan Al Nassr hma-hruaina leh sikhat faia an chakna goal ni zui ta thunin, he goal siam-chhuaktu hi Abdulmajeed Al-Su-laiheem a ni a, Al Ettifaq goal-keeper Paulo Victor chuan Talisca ball tauh kawh tak a dang zo lo.
Ronaldo hian second half-ah bicycle kick hmangin goal zawng bawk mah se hei pawh hi a hlawhtling zo ta chuang lo.
CHakna goal thuntu Talisca chuan Saudi Sports Channel hnenah football khawvela Cristiano Ronaldo pakhat chauh a awm thu leh ani an chang thei lawmawm a tih thu sawi chungin a bultanna inkhelah goal thun nghal zo lo mah se Ronaldo uapna boruak chuan team a tanpui tho tih a sawi.
Tarlan tak angin, league khelh 14-a point 33 rut tling chungin Al Nassr chuan league standing-ah a sangber an luahkir leh a; Pathiannia an chak hma khan Al Hilal chuan an lehpel zawk hman a, point thum hmu chungin an hmun ngai an luahkir leh ta thuai a ni. Al Ettifaq chuan 10-na an luah thung.
Ronaldo khelhna club Al Nassr hian Ningani zan Saudi Super Cup semi-final match-ah Al Ettihad bawk hi an hma-chhawn nawn leh ang.