Lionel Messi hoa Barcelona ropui chhoh vanglaia an player langsarte’n Catalan team an chhuahsan zo tep tawh a, Spain left-back Jordi Alba pawhin tun nipui thawh rual hian Nou Camp club atangin a puanthuah a puchhuak ve dawn ta.
An superstar Messi hruaikir leh tuma insingsa mek Barca hian player inpaihthawl an mamawh a, tun season tawp ruala Alba chhuahtir turin a defender contract neih lai tihtawp pawh an titlu ta a ni.
Jordi Alba hian defender ni chungin Barcelona tan goal 19 thun tling tawhin, assist phei chu tum 91 lai a nei tling tawh.
Tuna a hun hma deuha contract tihtawp hi player leh Spanish champion inbiakremnain a hrinchhuah niin, kum 34 mi ni ve ta Alba hian kum 2012 khan Valencia atangin Nou Camp a vaklut a, Barcelona thuam inbel chungin La Liga title paruk, Copa del Rey trophy panga leh kum 2015 khan Champions League-ah a champion-pui bawk.
Season kal laia La Liga lakpuia league game 29 a khelh tawh telin Alba hian a career pumpuiah Catalan club tan game 458 khel tling tawhin, kumin nipui lai hian club captain Sergio Busquets nen an kalbo ve tawh dawn a ni.
Tarlan tawh thin angin, Barcelona hian La Liga’s financial fair play rules mila inherrem turin chet an thawh a ngai a, tun season kal lai tan hma lawk khan an hmalama television rights an neih tur leh leh an media production unit Barca Studios pawh club-in a lo hralh tawh a, chumi avang chuan player thar pali an sengluh theih phah nghe nghe.
Sevilla atanga an lakluh France defender Jules Kounde chhawr thei tura register tur pawhin player thenkhat chhuahtir an ngai bawk.
Alba kalbo ve tawh dawn
![](https://theaizawlpost.org/wp-content/uploads/tap_logo-min-large.jpg)