Wimbledon 2025 khelh mekch champion lai Carlos Alcaraz a khel tha tulh tulh a, Thawhleh zana a khingpui Cameron Norrie sawpin semi-final a lut. Wimbledon-ah a vawi thum nan champion zawn turin Alcaraz hian vawi hnih chak chiah a mamawh tawh a. Semi-final-a a khingpui tur Taylor Fritz lakah fiahna hautak a hmachhawn tura ngaih a ni.
Champion lai Carlos Alcaraz hian quarter-final-ah inelna thlengtu British te inngahna awmchhun Cameron Norrie a hmachhawn. Norrie hian Alcaraz hi vawi hnih a lo hneh ve zuk tawh vang leh an tualzawla inkhel tur a nih vangin a lakah mipui beiseina a sang hle. Beiseina sang tak leh mipui tan rawn ni bawk mah se Norrie hian Alcaraz a ngam lo viau a, amah tana au rin chak mipui te auna hun tha siamsak thei lo a ni ber a, set la miah lo vin a tlawm.
Inelna a rei tulh tulh a, khel ropui tulh tulh Alcaraz hian Cameron Norrie lakah bul a tan tha viau a, set hmasa berah break a nei zawn nghal. Break a neih zawn theih vangin game hnih chiah hloh chungin set khatna a la.
Set a hloh hnuin Norrie a insiamtha thei chuang lova, Alcaraz service na tak tha taka vaw let turin thiamna ril a nei lova, thahrui a nei tha hek lo. Set hnihnaah pawh a serve a hum zo lo leh tlat a, a khingpui break tur khawpin a khel tha thei bawk si lo nen game thum bak a la theilova, set a hloh nawn leh.
Set hnih a hloh zawn hnu pawhin Norrie a insiamtha thei chuang lova, kawn tinrengah Alcaraz hi a ngam lo a ni ber mai. Set thumna tir lamah chetha ve bawk mah se hma lam a pan rei thei chuang lova, a serve a hum zo lo leh tlat. A khingpui tan break theihna hun remchang siamduh lo Alcaraz hian harsa lo takin set la leh ta mai a. Norrie lakah hian 6-2, 6-3, 6-3 a hnehna changin semi-final a lut a, Great Britain mipuite beiseina a chhem mihsak zui ta a ni.
World No. 2 a nih vangin Carlos Alcaraz hi seed no 2 ni chungin Wimbledon-a a inlan. Rinkai pahnihna ni bawk mah se Grass courtah a che ropui em em a, dang thei an awm meuh lo. First round-a a khingpui Fognini a la chai tawk deuh ber rih a, Fognini a paltlang hnuin a hmaa ding apiangte tui an an nem zel a, che hleithei lovin a siam ta zel. Thiamna ril tak a neih bakah a huaisen a, thahrui a ngahin a fit bawk si a,Alcaraz hi dan a har rih a ni. Wimbledon-ah hian vawi 23 zet a chak zawn tawh a, a vawi thum nan a champion zawn thei a nih chuan hetiang ti thei pangana chiah a ni ang.
Thawhleh zana inkhel dangah kum 27 mi Taylor Fritz chuan set khat hloh chungin Karen Khachanov a hneh a, Wimbledon-ah a vawi khat nan semi-final a lut. Fritz hian Khachanov hi 6-3 6-4 1-6 7-6 (7-4) in a hneh. Semi-final-a khingpui tur Carlos Alcaraz nen hian vawi hnih inhmachhawn tawhin tlawm zawkah a la tang ve ve a. Alcaraz lakah set a la la miah lo nghe nghe a, a hmabak a hautak dawn hle.
