Alcaraz hmachhawn tur Medvedev

September 7, Ningani zing khan US Open 2023 khelh mek chu mipa lamah quarter-final khelh a ni a, champion lai Carlos Alcaraz chuan awlsam taka Alexander Zverev hnehin semi-final a lut. Champion lai Alcaraz hian third seed Daniil Medvedev a hmachhawn zui leh ang.
Mipa lamah quarter-final hnuhnung berah Carlos Alcaraz hian khingpui hautak tling tura ngaih Zverev lakah a khel tha leh viau a, Hard Court-a ala hneh loh German hi set khat lek pawh laktir duh lovin a sawp a. Zverev lakah hian a serve a hum tluan vek bawk. Alcaraz a khelh tha em em laiin inkhel hmuhnawm lantir thei tura ngaih Zverev erawh a khel chhe viau thung a, a khingpui Alcaraz hi ngam loh enin a en sa niin a ngaih theih hial a, quarter-final-ah hmuh hreawm khawpin a khel chhe ve thung . Quarter-final-a an intum hma khan Alcaraz leh Zverev te hi vawi nga an lo inhmachhawn tawh a, vawi thum chak tawh Zverev a chungnung zawk. Indoor Hard Court-a a vawi hnih a hneh tawh a hmachhawn dawn vangin Zverev hian Alcaraz kal tluang lai a tihtawpsak theih rinna lian tak a awm a. Chu beiseina chu mei khu ang maiin a zam ral chiang ta viau thung a, Alcaraz hmaah Zverev hi tui ang a nem!
Ningani zinga inkhelah hian awlam takin game khatna an la ve ve a, Zverev hian break theihna hun remchang a nei hmasa a, break se game hniha hmahruai fal thei a nih laiin ho tak takin a tisual zawn a, break theihna hun tha a neih a chhawr tangkai zo lo. A hun tha a hloh hnuin a serve hum zo lo zawkah a tang zui ta tlat a, Alcaraz hian game thum hloh chungin set hmasa a la.
Set hmasa a lak hnuin Alcaraz a huangtau lehzual a, a khingpui a thunun hneh telh telh. Zverev-a’n break theihna hun remchang a neih a chhawr tangkai theih loh zel laiin ani erawh chuan break theihna hun a neih dek tawh chu a chhawr tangkai vek thung a, a khingpui a break nghal zel. Set hnihnaah hian break a neih zawn a chhawr tangkai a, game hnih chiah hloh chungin set a la nawn leh a, semi-final a hnaih ta hle.
Set hnih a hloh zawn hnuin set thumnaah Zverev a insiamtha hret a, set hmasa pahnih aiin a khel tha ta hret. Khel tha chho bawk mah se break theihna hun remchang a neih a chhawr tangkai thei chuang lo va, break theihna hun tha a neih ve changin amah ngeiin ho tak takin a tisual zel a, break a neih theih loh phah. Break a neih theih loh laiin a khingpuiin break point a neih hlekin Zverev hian deuce em pawh a neihpui thei leh chuang miah lova, ho takin a serve a hloh leh. Break pawimawh tak a neih vangin Alcaraz bawkin harsa lo takin set ala nawn leh a, 6-3, 6-2, 6-4 a hnehna changin semi-final a inhlangkai zui ta a ni.
Inkhel pawimawh takah hnehna a chan vangin Carlos Alacaraz hian Zeverev a umphak a, head to head-ah chak zawk awm lovin 3-3 a ni ta chiah. Ningani zinga an khelh dan enin Zverev hian a tifuh viau a nih loh chuan Alcaraz hi a hneh leh theih a rinawm loh viau a. Chuti a nih chuan Spaniar hian German lakah record tha zawk neiin a chungnung zui theih viau a rinawm. Ningani zingah kha chuan Zverev hian Alcaraz hi hneh loh ena enin, a hlau sa tlat a, chu chu a tuarzui ta ni berin a lang. Zverev vaw tlatu Alcaraz hian semi-final-ah third seed Daniil Medvedev a hmachhawn zui leh ang.
Alcaraz hmaa fiahna hautak hmachhawn tur Russian Medvedev hian nilai zan khan a khingpui Andrey Rublev chu set hloh lovin a hneh a, US Open-ah a vawi hnihna atan champion a tumna kawngah rahbi tuk belh in, semi-final a inhlangkai.
2021 US Open champion Medvedev hian nilai zan, khaw lum tak hnuaia a khing-pui Rublev lakah bul a tan tha lova, set khatnaa a serve hmasa ber a hum zo lo nghal pang. Rublev hian 3-0 a hmahruai fal theihna hun remchang nei bawk mah se a serve a hum zo bik lo. Hmahruai fal theihna hun remchang a neih a chhawr tangkai zawh loh vangin a khingpui er let a tuar lo zui a, set hloh hmasa zawkah a tang.
Harsa taka set khatna a lak hnuin set hnihnaah Medvedev a khel tha chhunzawm a, game thum chiah hlohin set a la nawn leh. Set linaah inbeitawk chho viau mah se Medvedev bawkin break a nei leh a, game li hloh chunga set la lehin a hnampui Rublev chu 6-4, 6-3, 6-4 in a hneh a, semi-final a lut.
Semi-final a intum tur Carlos Alcaraz leh Daniil Medvedev te hi vawi thum an lo inhmachhawn tawh a, vawi hnih chak zawka tang Alcaraz chu an inkarah a chungnung zawk. An intum vawi khatna Wimbledon 2021-ah Medvedev-a’n set hloh lovin hnehna chang bawk mah se an intum hnuhnung vawi hnihah Alcaraz hian set hloh lovin hnehna a chang ve thung. An ni pahnih hi an intum hnuhnun ber tum chu Wimbledon 2023 – Semi-final-ah a ni a, Alcaraz hian Medvedev sawpin final a lut a, final-ah Djokovic hnehin a champion zui hial nghe nghe. US Open semi-final-ah an intum zui leh zat dawn a. Medvedev hi a champion tawhna US Open-a hian Wimbledon ai chuan a che thei deuh tura ngaihna a awm a. Alcaraz kal tluang lai dang tur ema rin ngam erawh a ni lo thung a. Alcaraz lakah set a la mial a nih chuan a khel tha tiin a sawi theih ang a, a chak hlauh a nih phei chuan inlehthalna lian a tling ngei bawk ang. Inrinni zing lamah inkhel hmuhnawm beisei phawt ang.