Alcaraz tan US Open hnehtu nih man world number one
Defending champion Jannik Sinner hneha Pathiannia US Open title a lak hnuah Carlos Alcaraz chuan ATP ranking-ah number one a luahkir leh ta.
Arthur Ashe Stadium inkhelah kum 22-a upa Spaniard khan Italian lakah a masterclass lantirin, set hnihna a hloh tih loh chu harsatna lian lutuk tawk loin 6-2, 3-6, 6-1, 6-4 hnehna nen a career la rei lo taka a vawi hnihna atan Flushing Meadows title a hlawhchhuak leh ta a ni.
Alcaraz hian kum thum kalta mai khan New York khuaah hian a major title hmasaber lain, rawlthar hlauh nei lo khawvelin a hmelhriat kha tunah chuan six-time Grand Slam champion a lo ni ta reng mai!
Pathianni final-a Sinner a hneh kha kumin Wimbledon final phuba lakna tuihnai a ni satliah mai lo a, US Open title khan world ranking-ah a lera thu Italian a pawtthla tel a, kum 2023 hnu lama a vawi khatna atan World No 1 a ni zui leh ta a ni.
Chu mi chungchang chu sawiin Spaniard chuan, “Number one (ranking) hi kumin kumtira ka goal tura ka dah ngheh tawh kha a ni a, a hlawhtlinna ka hmu thei hi a awihawm loh hial zawk a ni.
“Grand Slam title dang lakbelh chunga chu dinhmun luah phei chu a tuiawm zual,” a ti.
Alcaraz tan US Open hnehtu nih man world number one
