All India Sunday School Association (AISSA) 8th Triennial Conference chu November 27 & 28 chhung khan Inter-Church Service Association Conference Hall, Egmore Chennai-ah thupui “Sunday School; Affirming the Dignity of Children” tih hmanga neih a ni a. Pawl president tharah Mizoram Presbyterian Church hminga tel Rochamliana thlan a ni.
AISSA hi National Council of Churches in India (NCCI) hnuaia peng (agency) pakhat a ni a. NCCI-a inziaklut kohhran zawng zawngte telna pawl, India rama Kristian pawl lian tak zing ami a ni. NCCI hnuaia agency a nih angin tun thlengin AISSA hi NCCI thlazar hnuaiah a la awm ta zel a, Nagpur-a NCCI Campus-ah office pawh ruahmansak a ni.
8th Triennial Conference hian AISSA hmasawn zelna atan hmunhma tur zawn leh office leh quarters tur sak a rel a. Thurel dang zingah, vohbik naupang (intellectually challenged children) te tan Sunday School-a tlangnel taka an tel theihna tur kalphung duan a nih theihnan sawiho tura inrawnkhawm (national consultation) buatsaih, theological education hnuaia Christian education kalpui tura hma lak dan tur sawi hona (national symposium) huaihawt, India ram pumah Sunday School zirtirtute tan training programme tam zawk buatsaih, online training course tam zawk siam, Regional Children Assembly huaihawtte a tel. India ram hi zone paruk a thenin zone tinah Regional coordinator dah tura rel a ni bawk.
Conference-ah hian Church of South India (CSI-SEVA) director Rev Benjamin Imbaraj chuan keynote address a sawi a, NCCI general secretary Rev Dr Asir Ebenezer chuan Bible Study a kaihruai a ni. Kum 2023 – 2027 chhunga AISSA office bearers thlanchhuah an ni a. President – Rochamliana, Mizoram Presbyterian Church Aizawl; vice president – Rev Dimple Titus Runner, Methodist Church in India, Ahmedabad Gujarat; general secretary – Rev. Dr TI James, St. Mary’s English Church, Calicut Kerala (ruat); treasurer – Dr Angelious Michael, Jeypore Evangelical Lutheran Church, Nagpur Maharashtra; office bearers pali bakah hian Governing Council member atan mi 6 thlan an ni.
AISSA office bearers thar leh Governing Council member tharte hi NCCI general secretary Rev Dr Asir Ebenezer-a’n a dahnghet (install) a, AISSA president kalchhuak Rev K Cecil Victor, CSI Wesley Church, Secunderabad Telengana-in Pathian hnenah tawngtaiin a hlan a ni.
All India Sunday School hruaitu ah Mizopa thlang
