Aloe Vera hman tangkaina tur

Aloe Vera hman tangkaina tur
Aloe vera thatna chi hrang hrang kan rawn tarlang tawh a, tun tumah hian Times of India health section-in aloe vera hmang tangkai theihna chi hrang hrang an sawi te kan rawn tarlang leh e. Aloe vera hi skincare atanga hair care leh hliam/pem enkawlna thlengin a hman theih. A kawr chhah tak hnuaiah hnâng ban deuh thler mai awm hi a hnahin tui a khawlna a ni a, he thil hnâng tuiah hian vitamin, amino acid, minerals leh antioxidant a tam hle a ni.
1. Aloe vera gel thatna hi atam khawp mai, a that em emna pakhat chu kum a lo upat ang zela vun lo chuar ve thin, wrinkles hi a timuang thei. Aloe vera hian anti-aging effect a nei a, vun chuar leh inrin te a tiziaawm thei a, vun chuar hma tur te pawh a veng thei. Hmeichhe chi hrang hrangah zirchianna an neihah chuan aloe vera gel hman hian collagen production a tipung a, chu chuan vun fân theihna (elasticity) a siamtha thei.
2. Ka chhung durh (canker sores/ mouth ulcer) tan aloe vera a tha hle. Hetiang ka chhung na hian kar khat te a awh thei a, thil ei a harsain a na hrehawm hle thin a ni. Mithiam ten zirchianna an neihah chuan hetiang ka chhung naah hian aloe vera gel emaw aloe vera rawt kawi emaw hnawih hian a tidam chak a, a na a tiziaawm thei bawk.
3. I sam a tla nasa em. Aloe vera-ah hian proteolytic enzymes a awm a, chu chu kan luvun a cell thi te ti tlatu a nih bakah keratin a pai bawk a, chu chu sam enkawl nana tha tak mai a ni a, sam tla tur te pawh a veng thei. Aloe vera juice leh coconut oil chawhpawlh la, chu chu i samah hnawih thin rawh, hei hian sam tla nasa tur a veng thei a, sam a tinemin a titha thei bawk.
4. Ha na nei te chuan hahni na te pawh an nei duh hle a, aloe vera hian ha a bal bet bacteria siam thei te a tihlum thei a, chuvangin ha nget leh hahni na awm tur a veng thei.
5. Intihcher duhte tan pawh aloe vera a tha hle mai. Vitamin leh mineral chi hrang hrang a pai hnem a chu chu rihna paih tura mi pui thei chi a ni lehnghal a, chuvangin aloe vera juice in thin a tha hle. Rihna tihhniam nana mi a puih theih bakah taksain kan ei leh in te taksa tana a hman tangkai theih nan lo hip zung zung tura puitu tha tak a ni bawk.
6. Blood sugar level a tihniam thei. Aloe vera juice hi zunthlum nei tan inenkawlna tha tak a ni, insulin sensitivity a siamtha thei a, blood sugar level a tihniam thei.
7. Kâng (burns) tan pawh a tha hle. I intikang palh a nih chuan a kâng laiah khan aloe vera tui sawr la, a gel emaw pawh hnawih a tha. Hei hian kang sa a tidai rang a, a tidam chak a, a ser nasa tur a veng thei bawk. Sunburn enkawl nan pawh a tha hle.
8. Ek-khal tan aloe vera a tha. Hemi atan hi chuan aloe vera latex a tha ve thung a, latex hi chu gel a ni lo va, aloe vera kawr (skin) hnuai chiah a thil hnâng eng deuh bet (sticky yellow residue) hi a ni. Hei hian ek-khal a tiziaawm thei.