Pawngsual thubuaia Barcelona court-in thiamloh chantira lung ina a khungbeh tak Brazil defender hlui Dani Alves-a lim chu an ram Brazil rama a chenna Juazeiro khua-ah langsar taka din a lo ni tawh a, khatia a mualpho hnu khan Brazil jersey haa a tiat chiah lim an din chu ding reng tlaka ngai loin an tichhe ve ta a ni.
Kum 2022 khan Bar-celona nightclub pakhat toilet chhungah min pawngsual tiin Spaniard hmeichhe pakhatin Barcelona defender hlui hi court-ah khingin, man a nih hnuah bail-a chhuahtir pawh remti loin a chungthu an ngaihtuah thlengin lung inah a tang a, tun Fe-bruary ni 22-a thiamloh chantir a nih hnuah kum li leh a chanve tang tur leh sum tha hnem tak chawi tura hrem a ni a, Bahia state-a Juazeiro khaw mipuiin chhuang taka a khaw ti-hmingthatu ni thin Alves-a lim an khawpui lun laia kum 2020-a an lo din tawh chu an namtlu zui ta a ni.
Tualchhung media-te tarlan danin, tun Nilaiini khan Alves-a lim chu a chhip atangin rawng vara theh a ni a, ni hnih hnuah bag duma khuhin an charbet zui a, tualchhung mite chuan Juazeiro town hall hnenah labo tura ngenin an dahbo ta a ni.
Tarlan tawh thin angin, Alves hi football chanchina player hlawhtlingberte zinga lang pha niin, a career-ah title 43 tehreng a hlawhchhuak tling a; Brazil tan pawh game 126 khel tlingin, national team chu Copa America trophy pahnih leh Olympic gold medal pakhat a lakpui.
Alves-a lim an tichhia
![](https://theaizawlpost.org/wp-content/uploads/Untitled-938.jpg)