Aizawl Municipal Corporation huamchhungah chuan eirawngbawlna gas chu mahni kawtkaiah ngei dahsak vek an ni tawh nia ngaih a ni.
LPG home delivery hi Marketing Discipline Guidelines for LPG Distributorship phut angin ‘home delivery’ tih vek tur a ni a. Hemi ang hian Mizoram FCS&CA department chuan home delivery tih vek a nih theihnan hma a la thin a, Mizoram Consumer Union (MCU) pawhin kum 2015 vel atang khan tih hlawhtlin a nih theihnan hma a lo la la tawh tih thu dawn a ni.
Chhan engemaw avanga tih hlawhtlin hleihtheih a nih loh avangin MCU hian Mizoram State Consumer Disputes Redressal Commission-ah petition a thehlut a, Comsission hian kum 2023 khan thutlukna siamin, gas booking leh home delivery hi a nih dan tur ang taka kalpui turin LPG distributor-te a hriattir a ni.
Heti chung hian distributor lamin chhan hrang hrang chhuanlama home delivery an la kalpui theih loh fo avangin MCU hi Commission-ah a zualko leh a. He thu chai a nih chhung hian distributor thenkhat chu, guidelines-in a phut ang an tih loh avangin Commission hian sumfai a chawitir hman nual tih sawi a ni.
State Consumer Disputes Redressal Commission-ah hun rei tak chai a nih hnu in, tunah chuan Aizawl Municipal huamchhunga awm local council 87-ah chuan home delivery hi kalpui a ni ta tih thu dawn a ni.
Hetihlai hian Aizawl Municipal chhung ni lo, district headquarters thenkhat leh khaw thenkhatah pawh home delivery hi tha taka kalpui theih a nih thu dawn a ni bawk.
AMC-ah LPG home delivery ti vek
