Aizawl Municipal Corporation Board of Corporators (BoC) chuan kum 2024- 2025 atana budget cheng vaibelchhe 110.16 chu Ningani khan an pharh.
Ni hnih awh tur AMC BoC thutkhawm hi Aizawl mayor Lalrinenga Sailo chuan a kaihruai a, corporator-ten Aizawl khawpui hmasawnna tura ruahmanna an sawi ho. BoC meeting-ah hian Aizawl khawpuia ruahmanna (planning) mumal zawk a awm theih nan Aizawl Development Committee (ADC) din chungchang, parking chungchanga local council thuneihna pek theihna dan tur – Parking Regulations Amendment leh 2024- 2025 atana AMC budget sawi ho a ni.
BoC thutkhawm ni khatnaah hian executive corporator (Cash & Accounts) Lalringliana chuan AMC budget estimate 2024- 2025 a pharh a, vawiin – June 14 hian sawi ho a ni ang.
AMC budget 2024- 2025 pharh tak hi a pumpuiin vaibelchhe 110.16 a ni a, chu’ng zinga vbch. 11.01 chu AMC thawhchhuah (own source of revenue) tur niin, a dang zawng chu central leh state sawrkar atanga dawn tura beisei a ni. Own source of revenue zinga vbch. 6.2 chu Property Tax atanga hmuh beisei niin, a dang hi CSTT, CCBT leh AMC building luahman (rent), parking fee, hoarding fee adt. atanga hmuh tura beisei a ni.
Kum 2024- 2025 chhunga 15th Finance Commission grant AMC-in dawn a beisei zat cheng vbch. 39 atanga vbch. 9.23 chu Lunglei Municipal Council tan dahhran (set aside) a ngai tih sawi a ni a. Chutih laiin AMC sum thawhchhuah a pung zawnga a kal thei chu lawmawm an tih thu sawi a ni. Solid Waste Management Center Tuirial pual bik atan nuai 492.57 state sawrkar atanga dawn tur chu lawmawm an tih thu sawi a ni bawk.
BoC thutkhawmah hian Ward No.VI corporator, kumin March 21-a thi John Zosangliana Ralte sunna hun hman a ni.
AMC budget vbch. 110.16 pharh
