AMC hna lak danah rinhlelh an nei
Sut loh chuan MZP-in hma lak tum
Aizawl Municipal Corporation (AMC) hnuaia na lakah thil felhlel, mimal induhsakna uchuak a awma an hriat avangin Mizo Zirlai Pawl chuan a rang thei anga sut a, dik taka hna la turin an ngen.
MZP Gen. Hqrs thuchhuak chuan, kumin September 11-a AMC Executive Council thukhawm chuan hna hrang hrang, fixed pay leh contract basis-a lak nise, a ti a. Hna hi advertisement tel loin, an duhsak zawng an la nia a lan thu a sawi.
‘Thalai lehkha thiam hna zawng mek tam tak awm karah duhsak zawngte hnaa thun thawm hriat tur awm fo hi MZP chuan pawi a ti a, a dodal a ni,’ a ti.
AMC Executive Council hian public relations officer 1, project assistant 2 leh asst. account officer 1 chu fixed pay-a lak a rel a, lak fel an ni tawh a. Consultant geologist 5, urban animal husbandry & veterinary officer 1 leh junior engineer 1 chu contract basis-a lak tura tih a ni bawk tih MZP hian a sawi.
‘Hna hi a duh apiang tan dil theih turin advertisement chhuah a ni loa, sawrkar phalna pawh an la lo nia hriat a ni. Tun kar chhunga sut turin AMC hotute kan phut a. Kan ngenna in awmzia a neih loh chuan, hna zawng mekte thlavang hauhin hma kan la ang,’ a ti
Kumin March 12-a AMC hnuaia geologist pathum bakah urban animal husbandry & veterinary officer, junior engineer leh asst account officer pakhat theuh lak danah dan kalha thiltih a awma hria in, na takin a lo dodal tawh a. MZP ngenna angin AMC chuan March 15 khan a sut (revoke) a, March 18-ah sutna lehkha tihchhuah a ni tih a sawi bawk.
‘He hna sut tawh hi tunhnaiah tharthawh leh niin, a mi ngai thenkhat thun nawn leh ngat an ni hian, duhsak zawngte hnaa thun theihna tura ruahman a ti rinhlelhawm hle a. Sawrkar hnaah a thiam leh tling chauh lak zel kan duh a. Mimal induhsakna hmanga hna lak hi kalpui tawh lo turin sawrkar hnuaia department leh agency-te kan ngen nawn a ni,’ MZP hian a ti.
AMC hna lak danah rinhlelh an nei Sut loh chuan MZP-in hma lak tum
