AMC-in hotel leh hostel endik dawn
Aizawl Municipal Corporation chuan an hnuaia awm restaurant leh hotel bakah hostel thianghlimna leh inenkawl dan an endik thin dawn.
Aizawl Municipal Corporation (AMC) Board of Councillors thutkhawm ni hnih awh tur chu Zirtawpni khan tan a ni. Aizawl mayor Lalrinenga Sailo chuan kaihruaiin AMC budget 2023- 2024 pharh a ni. AMC hmalakna hrang hrang report ngaihthlak a nih bakah corporator pahnih – Rosiamngheta leh Lalfakzuala Chenkual te motion putluhte sawi ho a nih hnuah pawm a ni bawk.
BOC thukhawm chuan Aizawl khawpui chhunga restaurant, hotel leh hostel te chu AMC Licensing Regulation 2012 hnuaia register an nih angin, he dan hnuaiah hian an thianghlim dan leh inenkawlna felfai dan endik thin ni rawh se, tiin a pawm.
Mizoram sawrkar Health department-in Dengue hrileng pung zel tur do pui tura AMC a ngen angin, Dengue do hmalakna atan AMC huamchhunga veng hrang hrangten an hman theih turin fogging machine lei turin pawm a ni bawk.
AMC-in a hman mek, lei laih khuahkhirhna dan ‘AMC Site Development and Slope Modification Regulations 2007’ chu tun aia mipui tana awlsam leh zangkhai zawka kalpui a nih theihna’n hma lak remtih a ni.
Executive councillor, Cash & Accounts changtu Lalringliana chuan AMC Budget 2023- 2024 sawifiahin a pharh a. June 5 (Thawhtanni) ah sawiho tur niin, a zat pawh hi hriat theih chauh tur nia thu dawn a ni. Budget pharh hnu hian meeting hi tihtawp lailawk a ni.
AMC-in hotel leh hostel endik dawn
