AMC-in RE budget vbch.114 pawm Ama sum thawhchhuah ve vbch. 7.5

AMC-in RE budget vbch.114 pawm
Ama sum thawhchhuah ve vbch. 7.5
Aizawl Municipal Corporation sawrkar kum kal meka revised budget estimate atan cheng vaibelchhe 114.04 a pawm. Kum kal mek chhung hian ama puala sum a thawhchhuah tawh chu cheng vaibelchhe 7.5 a ni.
Aizawl mayor Lalrinenga Sailo kaihhruaiin Zirtawpni khan AMC Board of Corporators (BoC) an thukhawm a. Revised budget estimate 2025- 2026, cheng vaibelchhe 114.04 pharhin lungrual takin an pawm a; Naming of Streets and Numbering Committee-in a lo thlir chian tawh Aizawl khawpui chhunga kawtthler, hmun leh step thenkhat hming phuah tura rawtna chhawp chhuah pawm a ni bawk.
Revised budget estimate hi executive corporator (Cash & Accounts) Lalringliana’n pharhin a sawifiah a. Cheng vaibelchhe 114.04 niin, budget estimate 2025- 2026 atanga a punna hi nuai 186.97 a ni. AMC budget atanga vbch. 91.52 (80.25%) chu mipui hmasawnna kaihhnawih (development works) thawhna atana hman tur a ni a; elected corporator leh thawktute hlawh kaihhnawih atan vbch. 15.73 (13.79%) hman tur niin, local council lawmman leh a kaihhnawihah nuai 122 ruahman a ni.
AMC sum hnar lian ber chu 15th Finance Commission grant niin, kum 2024- 2025 leh 2025- 2026 atana grant hmuh beisei chu vbch. 60.30 a ni a, hei hi sawrkar laipuiin a la pekchhuah tur a ni tih Lalringliana hian a sawi.
AMC hian 15th Finance Commission Grant Operation Guidelines a zawm tha hle tih sawiin, North East-ah a titha ber pawl a ni a. AMC term kal mekah hian corporator-ten mahni ward theuhah mipui mamawh (public amenities) tha tak an hnutchhiah theuh a, ward tinah Ward Development Fund atan nuai 73 theuh ruahman a ni.
AMC chuan hun hmasaa project lo awm tawhte pawh tha taka chhunzawmin, tam tak zawhfel a ni tawh a, chu’ng zinga a langsar zual chu – AMC Eco-Park Zonuam, AMC Eco-Park Ailawng, AMC Plaza Bawngkawn, AMC Multi-Complex Tuikual South, AMC City Bus Terminal Zemabawk a ni a, project kal mek pawh chak taka kalpui a ni tih a sawi.
AMC tan state sawrkar atang vbch. 25.57 hmuh beisei a ni a. Swatch Bharat Mission fund nuai 2 dawn niin, Aizawl Smart City Ltd atangin nuai 20 dawn a ni a, AMC sum thawhchhuah (own source of revenue) chu vbch. 7.5 a ni.