Hmangaihi pa
Tlemlai deuh khan Temple Corps a dar khawng ri vul vul a bik takin zan reh muttui tawh hnua ngaimawh tawk an awm avanga ti tawp tura hmalakna chuan beih a tawk hle mai. Damlo leh tar chak lo zan lama muhil tha hlei thei lo tan chuan a ngaihmawhawm viau thei bawk e. Engpawhnise, thenkhatin music-ah pawh heavy metal ring mangkheng an duh laiin music ri hrim hrim ngai thei lo an awm bawk. Chuvangin kan ngaihmawh zawng pawh a inang vek awm love. Kei ka ngaihmawh leh nin em em chu eng dang ni lovin AMC area chhunga Furniture Workshop ri bengchheng lutuk thu hi ka han chhimthal bekang puah pui ve phawng phawng mai teh ang.
Furniture Workshop: Veng tin deuh thawah hian AMC licence pek hmangin an duhna lai laiah Furniture Workshop te hi an inbun chawt zel mai niin a lang. Tun laia an hman thin thingzaina khawl, thing nawhna khawl, leh khawl dang dang furnitures hrang hrang siam nana an hman thin te hi a ri tih zawihna a awm bawk si lova, thenawm hnaia awm te tan chuan hneawm tak hi a ni ringawt mai. Lungmuang thlamuangin TV a en theih lova, tawng pangngai in inleng a ti ti pui theih tawh lova, chhungkua pawh ring leng lawnga inbiak a ngai zo vek tawh. Zan lama mu tha hlei thei lo tar leh damlo tan chuan anchhia a ni chiang khawp mai. Furniture Workshop thenkhat phei chu hnathawh hun bi pawh an nei lem lovin a lang. Zing dar 6:30 a thawh tan bur bur chang an nei a, zan lamah pawh dar 10 pel pela hnathawh chiam chiam an ching thin. |henawmten an ning viau angem tia inthlahrun chu sawiloh thenawmte tan ninawm kan siam lovang tih hlau ang maiin an thawm an dimlo thin. Inthlahrunna an nei chhete lo. Thenawmte an veng thawng miahlo bawk. Vai rama kan awm ve thin lai kha chuan hetiang workshop/factory ang hi chu Industrial Area-ah chauh awm an phalsak thin. Residential Area-ah hi chuan hahdam lungmuanga khawsak kan thlahlel a nih si hi mawle.
Dan leh hrai lam thlir ila Aizawl Municipal Council Licensing Regulations, 2012 hmangin Furniture Workshop atan license pek theih a ni. A pe theitu pawh Chairman a ni a, chairman in Chief Executive Officer hnenah thuneihna a hlan chhawng thei bawk. Heng trade license hrang hrang pek chhuahna kawngah hian AMC Chairman hian thuneihna lian tak a nei. Section 7 (b) ah leh Section 10 ah hian workshop dinna tur hmunah chuan boruak chhia (density of population or pollution) leh mipui tana remchanglo, ninawm khamawm lutuk (Public nuisance) avangte hian license pek a remtilo thei. Vawk vulh mai mai turah pawh thenawm khawvengte remtihna a ngaih si chuan Furniture Workshop meuh din phalna (license) pek dawn chuan thenawm a tuartu tur te remtihna (No Objection Certificate) hi chu phut ngei tur a ni. Local Council te hi chuan engmah tak tak an thli thlaiin a lang lo. A dil leh mamawh apiang hnenah remtihna an pe chhuak vel mai mai ni berin a lang. Chuvangin AMC Chairman pawh hian hetia license dil an awm chuan an thenawmte remtihpuina rawn la rawh u ti thin sela a tha hle mai. Chu chu he dan pawhina a sawi tum chu a ni.
A tawp berah chuan, nilengin mahni eizawnna hmunah kalin hah leh rim takin hna kan thawk a, tlai lamah kan lo thlakhlelh em em, thlamuang leh hahdam taka chhungte nena chen ho kan duhna hmun ngeiah kan han haw a. Karei karei, kan thlamuanna leh hahdamna in thin chu thenawm hnaia furniture workshop inbun tharte avangin hremhmun note-ah an lo chantir ta a nih hi maw le. Chhungkuaa hlim taka ti ti ho te chu a hnai tawh lo, TV en dawn ila full volume pawh kan hre thei meuh tawh lo. A ring apiang boral lo tur annih chuan thenawmte hi chu an boral lo chiang ngawt ang. Sorkar holiday kan nghah hlelh em em thin te khan awmzia a nei tawh miah lo. Tunhma lama power supply kan neih loh a kan phun nawi thin te kha tunah chuan hahdamna min petu zuk ni ta mai mai chuan. Kan khawvel hi a letling nge a linglet tih pawh ka hrethiam tawh nek love. AMC hotute u, thenawmte kan intualvuak hma ngei hian hma han la thuai thuai teh u.