AMC Mayor’s Cup final: Ward No VII vs Ward XII

AMC Mayor’s Cup final:
Ward No VII vs Ward XII
AMC Mayor’s Cup Inter Ward Football Tournament 2023 chu February ni 22, Nilaini zan khan Rajiv Gandhi Stadium, Salem Veng, Mualpuiah semi-final hnuhnung zawk Ward No XII leh XVIII-te’n an khel a; hunpangngaia 1-1 a nih hnu extra time khelh zawh thlenga goal dang a luh belh zawh loh avangin penalty shoot-out hmanga pawhthen an ngai a, Ward XII chuan 4-3 hnehna changin AMC Mayor’s Cup final an lut ve leh ta a ni.
February ni 24, zanin, Zirtawpni zan dar 7:30 hian Ward VII leh Ward XII-te’n final an khel ang.
Nilaini zana semi-final kha luhchilh ila; first half-ah goal hnih a lut a, goal hmasa ber hi inkhelh tan atanga minute 19-ah Ward XVIII tan corner atangin Salem Veng tlangval David-a chuan mawitakin an hmahruaina a khung.
Ward XII chuan an siphurh sut tumin nawrlet mah se first half chhungin an siphurh an sut zo lo.
Second half-ah Ward XII chuan an siphurh sut ngei tumin nawr mah se goal erawh an khung mai thei lo. Huntawp dawnah Ward XII keeper Lawmkima chu foul vangin hnawhchhuah ni mah se beidawng loin an nawr chhunzawm a, an thawhrim rah sengin hun tawp dawn injury time-ah forward Remruata chuan an siphurh a sut ta nge nge a, chak zawk awm loin hun pangngai an hmang zo.
Minute 30 hun pek belh an nih hnuah pawh goal a luh belh lo a, penalty shoot-out hmanga chak zawk zawn a nih hnuah Ward XII tana pet player palite’n chhuihlut vekin, Ward XVIII tana pet player pathum chiahin an pet goal thung a, Ward XII chuan 4-3 hnehna an chang ta a ni.
Ward XII-in player 10-a an khelh hnuah Ward XVIII-na dang tluanin penalty petah hnehna an chang zui leh a, Ward VII-na nena AMC Mayor’s Cup football final an khelh turah pawh hian inrintawkna thuk zawk an neih ngei rin a ni!
Chiang deuh zawkin semi-final hnuhnung zawk hi luhchilh ila; Rajiv Gandhi Stadium, Mualpuiah David Lalchhuanawma’n Ward XVIII hmahruaina’n a pet lut a, chawlhlawk hmain Dinthar, Tuikual North leh South tanhona team tan Lalrem-ruata’n an siphurh a sut.
Minute 78-ah Ward XII-na goal-keeper Lallawmkima hnawhchhuah a ni a, player pakhata tam zawk an nih hnuah veng pariat – Mission Veng, Salem Veng, Dam Veng, Venghnuai, Thakthing, ITI, Tuikhuahtlang leh Model Veng tel khawmna team-in an nawr nasa a, mahse, goal khat ve vein hun pangngai an hmang zo a, minute 30 dang an khelh leh hnuah pawh Ward XII-nain goal an chhuah belh lo a, penalty petah goal li goal thumin semi-final an paltlang.
Thawhlehni zan khan Ward VII-nain minute 120 an inkhelh chhungin goal hnih goal khatin Ward IV-na an hneh a, Zirtawpni zan dar 7:30 atangin Ward XII-na nen AMC Mayor’s Cup champion hmasa ber nih tumin Mualpuiah an inkhel ang.
Ward XVIII-nain chak thei tura hun tha an neih an puitlin theih loh an tuar a, minute 19-ah forward David-an tournament kal meka a vawi lina’n a khung a, tha taka corner a pet chu Lawmkima’n dang chhuak thei lovin goal-ah a lut a ni.
Lalrinzuala’n an siphurh sut theihna remchang bawhpelhin hnai tak atangin goal chungah a tauh chhuak a, nawr chhunzawmin Lalnundika’n tha takin a pet a, goal-veng Samuel B Vanmal-sawm-sanga’n nam kangin Lalrem-ruata’n a tauhlut a, first half tawp zui nghalin, goal khat ve vein an inhnehtawk.
Minute 70-ah Ward XVIII-in hma an hruai nawn teuh hle a, Van-lalngheta’n goal chungah a pet chhuak a, a hnuah David-an ball a um fal a, Ward XII-na goal veng Lawmkima tlan chhuakin penalty box pawnah a titlu a, red card a chawi a ni.
Minute 30 hun pek belh an khelh chhungin Ward XVIII-nain an nawrbet hneh hle a, Ngheta’n hun tha a neih laiin substitute John Lal-ruatfela’n a dansak a, player 10-a khel Ward XII-nain daihzai taka khel leh Tata Yodha Man of the Match Samuel Laltlanthanga hovin goal an veng tluan thei a ni.
Penalty petah Ward XVIII-na tana pen chhuak John Lalhruaitluanga’n goal chungah a pet chhuak a, lehlam goal veng Samuela’n Michael K. Lalhriatpuia pet dang ve leh mah se John-a’n Israel Laldingngheta pet a dansak ve leh a, Remruata’n Ward XII-na chakna penalty chhuihlutin hnehna an sualchhuak.