Aizawl Municipal Corporation (AMC) Ward No. XIX a by election neih tura candidate-te hming thehluh theih hun tawp thlengin mi pali in nomination paper an thehlut.
By election neih turah hian June 6 chawhnu dar 3.00 thleng nomination file theih a ni a. Candidate puang hmasa ber, ZPM official candidate C Malsawmtluangi, Hlimen Vengthlang chu nomination thehlut hmasa ber a ni a; Congress candidate Effie Vanlalhmangaihi, Venghnuai leh MNF candidate Dr Lalrinzuali Hrahsel, Kulikawn te bakah Ningania an candidate puang ve chauh BJP official candidate K Vanlalruati, Tlangnuam Vengthar te pawhin nomination tih theih hun chhung hian tih tur tul an thehlut fel a ni.
Nomination paper hi vawiin – June 7 chawhnu dar 1-3 inkar hian endik a ni anga, inhnukdawk leh duh tan June 10 chawhn dar 1.00 hmaa inhnuhdawh theih a ni.
Ningani tlai khan Aizawl district election officer Lalnunfela Chawngthu hoin he by election atana campaign senso awm thei hrang hrang leh a man zat tur bituk (rate fixation) siamin, Municipal returning officer Lalmuansanga Ralte, assistant Municipal RO KC Zalena, Election Expenditure Monitoring nodal officer Dr K Lalnghinglova, Media nodal officer Emily Lalrinpuii leh political party pali aiawhte hi an thukhawm a ni.
Tarlan tawh thin angin, AMC Ward No. XIX corporator Baryl Vanneihsangi Tlau chu 2023 MLA inthlanpuiah Aizawl South III bial atanga thlantlin a nih avangin corporator a nihna hi a kalsan a, by election hi neih a lo ngai ta a ni.
AMC Ward XIX corporator chuh tumin mi 4-in hming pe
