Union Home Minister Amit Shah chuan May 31 khan India-Myanmar border khua Moreh, Tengnoupal district-a awm chu tlawhin Kuki civil society group te nena inhmuhna an nei.
Shah hian May 29 zan khan Imphal a thlawk lut a, Kangkokpi district pawh tlawh nghal dawnin group hrang hrangte nena inhmuhna an nei ang.
Hetih lai hian militants leh security forces te chu Sugnu, Kakching district-ah an inkap nasa tiin officials te chuan an sawi thung a.
“Imphal East-a Sagolmang ah pawh inkahna thlengin militants te chetna avangin civilian hliam tuarte an awm,” tiin officials te chuan an sawi bawk.
Inremna awm theih nana hma a laknaah Shah chuan May 30 khan Kuki leh Meitei hruaitute a lo hmu tawh bawk a, security officers te nen pawh inkawmhona neiin remna a awm theih nan hmalakna an kalpui bawk a, hei bakah hian all-party meeting pawh neih a ni bawk.
Shah hi Home Secretary Ajay Kumar Bhalla leh Director of Intelligence Bureau Tapan Kumar Deka te chuan an zui a ni.
Congress ten president hnenah ngen
Congress President Mallikarjun Kharge leh a thuihruai midang pariat te chuan President Droupadi Murmu hmuin Manipur buainaa inrawlh turin an ngen a.
President hnena memorandum an thehluhah Kharge chuan Supreme Court judge chawlh tawh emaw kaihhruaiin high-level inquiry commission din phutin Manipur-a remna a awm theih nan 12-point charter an neih te an sawi lang bawk a.
President hmutu zingah hian Manipur Chief Minister hlui Ibobi Singh bakah, Congress leader Mukul Wasnik, Manipur Deputy Chief Minister hlui Gaikhangam leh Pradesh Congress Committee president Keisham Meghachandra Singh bakah AICC in-charge for Manipur Bhakt Charan Das te pawh an tel a ni.
“Tuna harsatna thlenna chhanah hian a tirah ruahmanna felfai awm loh vang a ni chungin tun hi mawhphurtu inkawh hun a ni lo va, hmalak hun a ni thung. Rawtna kan siamte a rang thei ang bera kalpui a nih chuan remna leh muanna a awm thei a ni. Congress chuan Manipur- a remna leh muanna a awma thil a pangngai theih nan puih a inhuam reng a ni,” tiin Memorandum thehluhah chuan tarlan a ni a.
“Supreme Court judge chawl tawh kaihhruaina hnuaiah high-level inquiry commission din ngei tur a ni,” tiin an sawi bawk a.
Presdident hnenah central sorkar chuan militant group tinte tuna SoS in a phuar leh phuar loh te pawh thunun an nih vek theih nan leh civilian group ralthuam nei te pawhin an tun vek theih nana hmalakna kalpui tura ti turin an phut bawk a.
Manipur state sorkar pawhin relief camp te enkawl thain health leh sanitation te a ngaihtuah takzet a tul tiin Congress te chuan an memorandum-ah chuan an tarlang bawk a.
A hnua press conference neihnaah Congress general secretary Jairam Ramesh chuan Manipur buaina chu BJP te divisive politics vang a ni a ti a. “Intelligence hlawhchhamna a ni a, administration leh politics hlawhchhamna a ni,” tiin a sawi bawk a.
“Tun hi tun hnai kum 22 chhunga Manipur-in buaina a tawh nasat tak tak tum hnihna a ni tawh a. June 2001 khan Atal Bihari Vajpayee thuneih laiin Manipur a buai tawh a, tunah Narendra Modi prime minister nih laiin kum 2023 ah a buai leh vak a ni. Heng te hi BJP te politics leh ideology vang a ni,” tiin Ramesh chuan a sawi bawk.
BJP te hian Manipur te ang chi leh hnam chi hrang hrang awmnaah leh State dangah te pawh thil an kalpui dan chu hun reia vantlang lungrualna atana him lo zel a ni, tiin Ramesh chuan a sawi bawk.