17th Lok Sabha chu kar kalta Inrinni khan Ayodhya-a Ram Mandir sak special discussion neiha kharin a awm ta a.
17th Lok Sabha tantirah khan Article 370 of the Constitution Jammu and Kashmir special status pekna nuaibo a bultanin Inrinni khan a kharnaah Ayodhya a Ram Mandir sak sawihona neiha kharin a awm ta a ni.
Heng thil pahnih te hi BJP tena ram tana hmathlir an neiha a laimu lai niin chu mai bakah BJP kaihhruai NDA sorkar hnuaiah thil danglam leh chhinchhiahtlak tak tak a thleng nual bawk.
Article 370 nuaibo
Jan Sangh ideologue Syama Prasad Mookerjee a political goal ber chu Constitution Article 370 Jammu and Kashmir special status pekna nuaibo a ni a, chutak chu Narendra Modi sorkar 2.0 chuan a tihlawhtling ta a ni. Constitutional amendment pawimawh kalpui turin tam lamah harsatna a nei lo va, chuvang tak chuan sorkar political manager te chuan Rajysa Sabha-ah mamawh tawk neih tumin an thlurbing hmasa chat reng a ni.
Women’s quota law
Parliament a women’s reservation Bill pharh a nih atang kum sawm hnih pasarihnaah September 20, 2023 khan Parliament chuan lungrual takin Lok Sabha leh State Assembly a hmeichhia tena seat reservation hmun thuma thena hmun khat an neih theihna tur chu pawm fel a ni ta bawk a. Bill chu special session a pawm niin mahse kalpui tak hun tur chu delimitation exercise hnuah tur niin kum 2026 thleng chuan kalpui theih a ni dawn lo thung.
Parliament In thar
September 2023 a women’s reservation law pawm tak kha new Parliament building May 28 a Prime Minister Narendra Modi an a hawna legislative business hmasa ber a ni bawk.
Karnataka a Sringeri Math puithiam tena vedic chants an tih hnuah Prime Minisetr chuan pathian malsawmna dilin ‘Ganapati Homam’ a ti a, chumi hnuah Parliament building thara Lok Sabha chamber a Sepaker chair bul lawkah ‘Sengol’ a dah bawk a. Sengol hi Parliament building thar atan liau liaua Tamil Nadu a Adheenams tena an pek a ni a; mahse, parliament building hawn thar hi opposition party 19 te chuan boycott thungin a chhan an sawiah president tihtur a ni an ti a, prime minister in a hawng ringawt chu an duh lo a ni.
Triple Talaq khap
A sorkar term hnihnaa Narendra Modi an dan a siam thar zingah Muslim Women (protection of Rights on Marriage) Bill, 2019 chu a tel a. He dan hian triple talaq a khap mai ni lovin dan bawhchhiatna a ti zui bawk.
COVID protocol hnuaiah
Kum 2020 Monsoon Session kha corona pandemic avanga tihkhawtlai hmasak ber niin khatih lai khan Covid-19 protocol thlak danglam a nasa hle a. Lok Sabha leh Rajysa Sabha chuan meeting hran ve ve neiin member te chu hlat dahin an thu a, chu chu social distancing kalpuina niin MP te chuan Covid negative certificate an phawrh a ngai bawk.
Farm law pathum
September 2020 khan Covid protocol kalpui laiin parliament chuan farm law pathum chu Opposition tena an duh lo hle chungin a pawm lui a. Mahse, palriament pawnah farmer’s body te chuan nasa taka lungawilohna lantirin Punjab, Haryana leh Uttar Pradesh atangin Delhi panin kawngzawhna an nei hial a. Loneitute chu Delhi border ah lo danchah niin mahse loneitute chuan puan in te kaihin an inkulh zui a, a tawpah November 2021 khan sorkar chuan chung dan te chu a hnawl leh ta tawp a ni.
Criminal Code thar
BJP tena colonial law hnawl an tumna kal zelah 17th Lok Sabha chuan dan thar pathum Indian Penal Code, Code of Criminal procedure leh Indian Evidence Act thlaktu tur – the Bharatiya Nyaya (Second) Sanhita Bill, the Bharatiya Nagarik Suraksha (Second) Sanhita Bill leh the Bharatiya Sakshya (Second) Bill te chu a pawm bawk a. Heng dan passed a nih lai hian Opposition MP rual te chu suspend in an awm thung.
Suspension record
Lok Sabha kalta kha session tum khata MP te suspend tam ber tum record a ni bawk a. December 2023 Winter Session ah khan MP 146 suspend in an awm a ni. Opposition te chuan MP te suspend vak nachhan chu security breach chungchanga Home Minister zawhna an zawh an duhloh vang an ti.
December 13 attack
Security hlawhchhamna liantham thlengin Indian Parliament chhungah mi pahnih te chu visitor’s gallery atangin Lok Sabha chamber ah an zuang lut a. meikhu eng tichhuak thei canister kengin buai nuai nuai karah MP te chuan chung mi te chu man theiin security staff te hnenah an hlan a ni. Lok Sabha Sepaker Om Birla chuan security fello chu a mawhphurhna a ni tia sawiin mahse Opposition te chuan Home Minister Amit Shah chu insawifiah turin an phut thung.
Rahul Gandhi disqualification
Surat court in defamation case a thiamloh a chantir hnuah Congress leader Rahul Gandhi chu disqualify a ni a. BJP te chuan dan hnuaiah Rahul chu automatic in disqualify a ni an tih laiin Gandhi thung chuan Gautam Adani leh Prime Minister inhnimhnaiha Lok Sabha-ah a sawi avangin ‘case hlui tawh thartawh a ni’ a ti ve thung.
House chuan Trinamool Congress MP Mahua Moitra pawh a Lok Sabha credential- user ID leh Lok Sabha member’s portal password midang a hrilh avangin ‘unethical conduct’ tiin a hnawtchhuak bawk.