2011 disaster hnuah Japan-in nuclear plant lian ber tinung leh

2011 disaster hnuah Japan-in nuclear plant lian ber tinung leh
Japan chuan khawvela nuclear power plant lian ber, 2011 Fukushima disaster hnua a reactor zawng zawng an khar chu an tinung leh tan ta.
Tokyo hmarthlang, Kashiwazaki-Kariwa-a reactor number 6 hi a vela chengte tan a himna tawk leh tawk loh rinhlelhna awm karah tihnun a ni.
A tihnun leh hun hi a alarm chiang lo deuh (malfunction) avangin ni khatin an sawn tlai zawk a, thla lehah chuan sumdawnna atana hman leh tan an tum.
Ram dang atanga energy la lut nasa tak, Japan hi nuclear power hmang hmasa ber pawl an ni a; mahse, kum 2011 khan lirnghing na tak avangin Fukushima-ah hian chhiatna thlengin reactor 54 neih chu an tithi vek a. Hemi tuma chhiatna thleng hi khawvela nuclear disaster lian ber pawl a tling.
Tuna an tihnun leh hi Japan-in nuclear power tihnun thar leh an tumna hmahruai a ni a, hun rei tak an lo buaipui tawh.
Kashiwazaki-Kariwa reactor pasarihna erawh kum 2030 hma chu an tihnun theih a la rinawm chuang lo va, a dang panga erawh an hluihlawn (decommission) bawk a. Hetiang a nih avang hian a hmaa reactor pasarihten power gigawatt 8.2 an siam chhuah theih ang chu a phak dawn lo tawh hle a ni.
Tokyo vaukam hmarchhak lam km 220-a hlaa awm, Fukushima Daiichi tui ral khan radioactive a tiput a. A vela chengte thiar chhuah nghal niin thuneituten a him tawh ti mah se tam tak an la let lo.
Sawiseltute chuan plant neitu, Tokyo Electric Power Company (Tepco) chu an inbuatsaih tha tawk lo va, anni leh sorkar chu an thawkho tha tawk lo niin an sawi a. A hrana sorkarin chhuitu a ruatte chuan ‘mihring siam chhiatna’ tia sawiin Tepco chu a mawhphurtuah an puh a; mahse, a hnuah court-in an executive pathumte inthlahdaha puhna erawh a hnawl thung.
Hetiang a nih avang hian mipuiin tihnun leh an duh lo nasa a, Japan hian a reactor zawng zawng a tihthih phah a ni.
Kum 10 liam ta chhung khan power plant-te tihnun leh tumin beih reng a ni a, kum 2050-a boruak tichhe thei khu siam chhuah tawh loh tumna an neih tihhlawhtlin nan tihnun leh hi an duh a ni.
Kum 2015 atang khan reactor 33 tihnun theih an neih zinga 15 chu an tinung tawh a. Kashiwazaki-Kariwa plant hi Tepco ta zinga mi an tihnun leh hmasak ber a ni thung.
Kum 2011 hma lam kha chuan Japan-a electricity an hman 30% hi nuclear power a ni a, kum 2030-ah chuan 50% tlin an tum a. Chhiatna an tawh hnuah erawh an tum tihlawhtling thei lovin kum 2040-a electricity an hman 20% chu nuclear power nihtir leh an tum mek a ni.