202 MusiCares Gala-ah Bon Jovi an chawimawi
An rama February ni 2 zan khan MusiCares 33rd Person of the Year annual gala neiin, Los Angeles Convention Center-ah musician rual an pungkhawm a, Jon Bon Jovi chawimawina hun an hmang.
An chawimawi Jon Bon Jovi chuan a hun hawn nan an band album lo chhuak thar tur atanga an hla ‘Legendary’ hla hmangin bul a tan a, he hla hi Bon Jovi hla ngaithla thang tan chuan a music pawh a Bon Jovi leh ngawih ngawih khawp mai. Jon Bon Jovi chuan, “Ka rawn thlir che u a, executive rual nalh taka induang zaih mai te in ni nain, Bon Jovi concert a ni tih kan hrilh thar leh teh ang che u. Ka thu ngai lo a nia,” a ti a.
Tumah an thu hman ta mang lo, Bon Jovi hian Bruce Springsteen perform tur ko chhuak zuiin, “ka mentor, ka hero, ka unaupa, ka thian,” tiin Springsteen hi a address a ni. Springsteen hi a ni, Adele, kum 98, chu January ni 31 khan a thi a, hei vang hian MusiCares gala-ah pawh hian a inlan theih an ring lo kha a ni a. Bon Jovi pawhin hei hi sawi chhuakin, Springsteen nu thih thu a hriat hian Los Angeles lam panin thlawhtheihnaah a chuang tawh niin a sawi a, “Zanin hian ani (Springsteen) hi a rawn inlan thei lo a nih pawhin a hriatthiam awm ngawih ngawih ang. Mahse, zaninah, MusiCares-ah hian tel ngei a duh a. Zanin hian ka pualin he hmuna awm ve ngei hi a duh a ni. A chungah hian ka lawm kumkhua tawh dawn a ni,” a ti bawk.
An pahnih hian 2006-a Bon Jovi hla hit ‘Who Says You Can’t Go Home,’an perform bakah Springsteen hla ‘Promised Land’ pawh an sa dunin, Bon Jovi hian Springsteen trademark harmonica part a play a, a tawpah harmonica duet an nei dun nghe nghe a ni.
Bon Jovi chawimawina hunah hian Melissa Etheridge leh Larkin Poe te pawhin Jon Bon Jovi solo hit ‘Blaze of Glory,’ an perfrom a, Pat Manahan-a’n ‘It’s My Life’, Shania Twain-i’n ‘Bed of Roses,’ Sammy Hagar leh guitar slinger Orianthi ten ‘Give Your Love a Bad Name,’ Jason Isbell-a’n ‘Wanted Dead of Alive’ a perform a, zaithiam dang te pawhin 80s leh 90s a Bon Jovi hla hit hrang hrang an perform a, Goo Goo Dolls pawhin Bon Jovi hla thar deuh, 2016-a an tihchhuah ‘This House is Not For Sale’ an perform bawk.
Zaithiam lar thar deuh zawk te pawh an inlan a chung zingah chuan, Jelly Roll pawhin ‘Bad Medicime’ a perform a, Lainey Wilson pawhin, “We Weren’t Bron to Follow” a perform bakah Maneskin frontman Damiano David pawhin ‘Keep the Faith’ a perform a, The War & Treaty te pawhin “I’ll Be There For You” rilru khawih zet maiin an perform bawk.
202 MusiCares Gala-ah Bon Jovi an chawimawi
