Boruak bawlhhlawh (air pollution) chungchang hi kar tin, thla tin, kumtin teh reng a ni a. Aizawl khawpui chu Mizoram khawpuiah a bawlhhlawh chho chak ber lo thei loa, chutah pawh chuan Bawngkawn chhehvel chu bawlhhlawh chak ber a ni. Mizoram Pollution Control Board chuan boruak (air), tui leh ri (noise) lama bawlhhlawh (pollution) insiam dan hi khawl hmangin a teh reng a. Boruak (air quality index) bik hi Aizawl leh district khawpui hoah a tehna a dah a, Aizawlah hian hmun 5 – Sikulpuikawn, MINECO, Laipuitlang, Bawngkawn leh Dawrpuiah dah a ni.
Data an neih atanga a lan danin, kum 2020 hmalam kha chuan Sikulpuikawn leh Dawrpui hi a sang ber a ni reng a, 2020 hnulamah Bawngkawn hi a sang chho zawt.
Boruak thianghlim dan tehna hi hlawm ruka then a ni a. Hlawm khatna chu 0-50 (good) niin, boruak tha – mihring hriselna atana harsatna thlen loa ngaih theih a ni. Hlawm hnihna 51-100 (satisfactory) chu hriselna pan deuh tan thawk harsatna thlen theia ngaih a ni a; 101- 200 (moderate) chu chuap leh lung natna nei, naupang leh kum upa lam tan thawk tiharsa thei nia ngaih a ni tawh. 201- 300 (poor) chu rei tak hip luhin thawk a tiharsa a; 301- 400 (very poor) chu rei tak hip luhin thawkna kaihhnawh natna thlen thei a ni tawh a; 401- 500 (severe) chu mi hrisel pangngai tan pawh thawk lamah tawrh harsa tawha ngaih a ni.
Aizawlah hian kum 2020 hmalam kha chuan Sikulpuikawn leh Dawrpui hi a sang ber a ni thin a, 70 ((satisfactory) te a kai chho thin. Hetihlai hian Bawngkawn hi 50 a la kai ngai lo. Kum 2020-a 48 kha 2021 ah chuan 60 a kai chho a, 2022-ah chuan 80 a kai tawh. A hnuai chiahah hian Dawrpui (77) a awm.
Kum 2023-ah chuan Bawngkawn hi 109 a ni a, chu chu a hlawm thumna – moderate a ni chho tawh. 2024 ah phei chuan 115 a ni. Dawrpui pawh hian san lam a pan ve zel tho a, 2023-ah 83, 2024-ah 87 a ni. Aizawl hmun dang erawh hlauhawm khawp a ni loa, ‘good’ huamchhunga la awm vek a ni a, district khawpui dang pawh a la ziaawm vek bawk.
The Aizawl Post-in a zawhchiannaah MPCB hotute chuan, boruak bawlhhlawh dan an tehna zingah hian kawngpui vaivut khu leh lirthei khu a tel a, chu chu tunhnaiah Bawngkawnah hian a sang chho hle nia a lan thu an sawi. Hmun dang aiin lirthei lian a lut/ veivak tam lehzual a, Bawngkawn kawn phei kawng siam hma traffic jam thin nen, a tehna khawl an dahna laiin a zir bawk nen, boruak chhia hi a insiam tam tih an sawi.
Boruak bawlhhlawh tehna hi district dangah pawh, Champhai, Siaha, Lawngtlai, Lunglei, Serchhip, Kolasib leh Mamitah hmun hnih theuha dah a nih bakah Lengpuiah dah a ni bawk.
2020 hnu lamah Bawngkawn boruak bawlhhlawh chak ber
