2022-2023 hi hmasawnna hna thawh
nasat ber kum – Robert Romawia
Minister Robert Romawia Royte chuan 2022- 2023 chu Mizoram a sum hman tamna ber kum, hmasawnna hnathawh nasat ber kum a tling tih a sawi.
Thawhtannia MNF office, Mizo Hnam Runa inkhawmah MNF adviser ni bawk Robert Romawia Royte chuan Kum li leh tlem chhungin Pu Zoramthanga kaihhruai sawrkar chuan thil tam tak a ti tawh a, Mizoram history-a sawrkar ding tawhah tuna sawrkar chu manifesto tihlawhtling hnem sawrkar; kum 2022 leh 2023 chu Mizorama sum hman tamna ber kum, hmasawnna hnathawh nasat ber kum a tling, tia sawiin, “Development-ah hma kan sawn nasa em em a, Pu Zoramthanga sawrkar hi sawrkar hmasawn duh leh hmasawnna thawk nasa ber sawrkar a nim” a ti.
Chief miinster-in a duhsak bik tih hi a ri ring leh thin tih Robert Romawia hian sawiin, “Project reng reng hi khulam rel a ni a, min petu chu central a ni. CM hian min duhsak vek a, portfolio kan chan dan atang hian chhut ila, Pu RRR-a hi a duhsak bik em, tih lo zirchiang ula; annual plan leh NABARD-ah hian CM hian ka department hi min duhsak em tih lo chhut ula, CM hian min duhsak bik loh zia in hre thei maiin ka ring,” a ti.
Autonomous District Council changtu a nih ang pawhin ADC chhungah pawh danglamna an thlen dawn tih a sawi bawk.
Assembly House-ah Assembly procedure-te en hnua ngaihdam dil ngai a awm avangin ngaihdam a dil a, inngeih takin an inchibai a, thlate la ho mah se, a hnuah beihna chi hrang hrangin ZPM-in bei lehin, office of profit chungchangah beih a ni leh tih a sawi. Hmanah Prism lamin kohhran thawhlawm thawh thlengin an hek a, mahse malsawmna a dawn a nih avangin Pathian thu leh police lam thu awiin, thudik chu a lang leh mai tih a sawi. “Document leh proof engkim nei ka ni a, ka hriat loh lam dan a nih loh chuan engmah hlauhthawn tur a awm lo. ZPM lam zawk hian an hniam phah leh ang tih ka hlauhpui a ni,” a ti.
Congress party-in that loh theihlohna bawm sawi vul chuk mah se, an halral leh ta em ni tih turin a reh leh daih a. Pension scheme chunchang an rawn sawi ve pawh sawizui chi ah an ngai lo tih MNF adviser hian a sawi. ZPM chu tiau chunga ui bawk an sawi ang deuhin, an tal nat deuh apiangin an hniam sawt sawt zel nia sawiin, “Hre bik leh fel bik politics an khel a, tha bik, super bik intihna hi Mizo mipui rilrem zawng a ni lo a, engkima hre vek bik politics hi kan mamawh lo. Kan mamawh chu, kan ram tana hmasawnna thawk thei, mi hmusit leh diriam chung pawha theihtawp chhuahtute hi an ni. Theihtawp kan chhuah hmel hi thalaite hmuh chak chu a ni a, theihtawp chhuahtute hi chu min thlawp em em a ni,” a ti.
2022-2023 hi hmasawnna hna thawh nasat ber kum – Robert Romawia
![](https://theaizawlpost.org/wp-content/uploads/tap_logo-min-large.jpg)