2022 hnua a vawi khat Rajya Sabhya-ah BJP-in MP 100 nei tling

September 9-a vice president thlang tura inbuatsaih a nih mek laiin rorel mek, BJP chuan April, 2022 hnua a vawi khat nan ram rorelna in sang zawk, Rajya Sabha-ah nominated member pathum an neih belh nen member 100 an nei tling.
Dan hre mi, Ujjwal Nikam, foreign secretary hlui Harsh Vardhan Shringla leh social worker C Sadanandan Master te chu thla hmasa khan Rajya Sabha MP atan lak luh an ni a, kar liam ta khan BJP zawmin member 102 an neih tlin phah.
Rajya Sabha-ah hian MP 240 an awm mek a, heng zinga 12 chu ruat (nominated member) niin hmun nga ruak a awm.
March 31, 2022-a Rajya Sabha bial 13 inthlan result a chhuah khan BJP hi India chanchina a vawi khat nan parliament rorelna in sang zawkah member 100 nei tling thei party pahnihna an lo ni tawh a. Congress chuan kum 1988 leh 1990 khan an lo nei tling tawh a. Hemi tum hian BJP chuan 97 an neih atangin 101-ah an kai a ni.
Kar hmasa khan BJP hian MP 99 an nei a. An kaihhruai NDA chuan 134 an nei mek a, heng zinga panga hi ruat 12 awm thei zinga panga an ni a, a lan danah chuan a zahve, 121 chu an pel a ni.
Kum 72 mi, Nikam-a hi 26/11 Mumbai attacks-a special public prosecutor atana ruat a nih atanga ngaihven hlawh niin he beihna thlenga a titu man awm chhun, Ajmal Kasab-a hremna thu titlutu kha a ni.
Kum 2016 khan Padma Shri hlan niin nikuma Lok Sabha inthlana khan Mumbai North Central bialah BJP hmingin a chuh a; mahse, Congress atanga chuhtu, Varsha Gaikwad lakah a tlawm.
Shringla hi kum 2020 leh April, 2022 inkara foreign secretary niin kum 2023-a G20 summit-ah khan chief coordinator a ni bawk a. US-a Indian ambassador leh Bangladesh-a Indian high commissioner a lo ni tawh bawk.
Master-a hi Kerala-a social worker leh zirtirtu a ni a. Kum 1994 khan a ke a bung a, a beitute hi CPM worker-te nia puhin BJP a thlawp chhanah pawh hei hi a puh a. Kum 2016 khan Kerala assembly inthlanah BJP hminga dingin a tling lo thung.
Thla hmasaa Rajya Sabha member atana ruat zingah hian political scientist leh historian Meenakshi Jain-i pawh a tel a. Indian Council of Historical Research-a member ni mek niin kum 2020 khan Padma Shri hlan a ni bawk.