2023 MTV VMA-ah Cardi B & Megan Thee Stallion perform dawn

2023 MTV VMA-ah Cardi B & Megan Thee Stallion perform dawn
An rama September ni 12 zan dar 8, keini tana September ni 13 tuk a sem tur 2023 MTV Video Music Awards a perform tur an puan tharah Cardi B leh Megan Thee Stallion an tel a, anni pahnih hian an hla thar ‘Bongos’ an perform dawn a, he hla hi live-a an perform vawi khatna tur a ni a, a hla hi Zirtawpni kaltaa an tihchhuah kha a ni a, an thawh dun vawi hnihna niin, an hla hmasa zawk ‘WAP’ chu Billboard Hot 100-ah No.1 kaiin, hmeichhe rapper inkawp zinga Hot 100-a No.1 kai thei hla nei thei hmasa ber an ni nghe nghe.
Cardi B leh Megan Thee Stallion te hi VMA mai show-a an perfom vawi khatna tur ve ve a ni bawk a, Cardi B hi 2017 khan pre-show-ah inlanin, a hla hit ‘Bodak Yellow’ a perform a, Megan pawh hi 2019 khan pre-show-ah inlanin ‘Big Ole Freak,’ ‘Hot Girl Summer’ leh ‘Cash Sh_’ te a lo perform ve tawh bawk.
Kumin VMA-ah hian hip-hop an langsar riau a, Nicki Minaj a ’emcee’ dawn a, a perform dawn bawk a, Diddy-a’n Global Icon Award a dawng dawn a, ani pawh hi a perform nghal dawn a, Lil Wayne leh Metro Boomin te pawh perform tur zingah an tel a, Metro Boomin hi Future, A Boogie Wit Da Hoodie, Swae Lee leh NAV ten an tawiawm dawn bawk a ni. He show-ah hian hip-hop kum 50 tlin champha lawmna an nei nghal dawn bawk.
Olivia Rodrigo pawh Prudential Center, Newark, New Jersey-a MTV VMA semnaah hian a perform dawn a, ani hi MTV VMA stage-a a tum hnih perform-na tur a ni a, kum hnih liamta khan a hla hit ‘Good 4 U’ a lo perform tawh a, hemi tum hian best new artist bakah song of the year leh PUSH performance of the year a dawng nghe nghe a ni.
Tun tum MTV VMA-a perform tur an puan zingah Anitta, Demi Lovato, Karol G, Kelsea Ballerini, Lil Wayne, Måneskin, Sean “Diddy” Combs, Shakira, Stray Kids leh TOMORROW X TOGETHER te pawh an tel a, Shakira hian Video Vanguard Award a dawng dawn bawk a ni.
Kumin MTV VMA nomination-ah hian Taylor Swift a langsar ber a, nomination 11 a nei a, SZA-i’n nomination pariat neiin a dawt a, BLACKPINK, Doja Cat, Miley Cyrus, Nicki Minaj leh Rodrigo ten nomination paruk theuh an nei a, Kim Petras leh Sam Smith ten panga ve ve an nei a, Beyonce, Diddy, Drake, Ice Spice, Karol G, Metro Boomin, Shakira leg TOMORROW X TOGETHER ten pali theuh an nei bawk.