2024-a country singer tour atanga sum hmu hnem ber Zach Bryan
Billboard chuan an year-end Boxscore chart an tichhuak a, thla 12, October ni 1, 2023 leh September ni 30, 2024 inkara country singer tour ticket hralh leh ticket man atanga sum an hmuh dan atang tehin, kumina country singer tour hlawhtling ber chu Zach Bryan a nih thu an puang.
Country music hi kum za tel teh meuh a upa ni tawh mah se a thing thei tak tak chuang lo. COVID-19 hripui len hnuah phei chuan pop nen a inhnimhnai sawt ta hle a, zaithiam te pawhin pop leh country hi an zuan tawn zak zak tawh mai. Radio lamah pawh country music-in play a la hlawh tam khawp mai a, COVID hnuah he genre hi a rawn alh thar lehzual ta a ni.
2023-ah pawh Jason Aldean, Zach Bryan, Kacey Musgraves, Oliver Anthony Music leh Morgan Wallen ten Billboard Hot 100 (singles) chart an luah lum tha ngar ngar khawp mai a, kuminah lah Post Malone, Shaboozey leh Morgan Wallen ten he chart-ah hian No.1 dinhmun an hauh deuh ngar ngar bawk. Hei mah mah Beyonce country album ‘Cowboy Carter’ leh a album ‘Texas Hold ‘Em’ kan la sawi lo zawk a nia!
Kuminah pawh country musician te tour hralh a kal hle a, country star zinga kumina tour hlawhtling ber chu Zach Bryan niin, ani hian show vawi 64 a nei hman a, ticket maktaduai 1.6 hralhin, a ticket hralhna atanga a sum hmuh pawh dollar maktaduai 321.3 a tling. Zach Bryan hi country chauh ni lo, genre hrang hrang khaikhawmah pawh tour hlawhtling No.3 a ni phak a ni.
2024 Country touring
top 10($ a maktaduaiin):
1 Zach Bryan – $321.3M
2 Luke Combs – $173.6M
3 Kenny Chesney – $159.5M
4 George Strait – $125.2M
5 Chris Stapleton – $81.9M
6 Tim McGraw – $53.1M
7 Tyler Childers – $52.5M
8 Jelly Roll – $41M
9 Shania Twain – $40.5M
10 Luke Bryan – $39.7M
2024-a country singer tour a\anga sum hmu hnem ber Zach Bryan
