2024 CMA Awards nominations-ah Morgan Wallen a langsar

2024 CMA Awards nominations-ah Morgan Wallen a langsar
2024 Country Music Association (CMA) Awards nomination an puang ta a, Morgan Wallen langsar berin nomination pasarih a nei a, Cody Johnson leh Chris Stapleton ten nomination panga ve ve neiin an dawt a, Post Malone leh Lainey Wilson ten pali ve ve an neih bakah Louis Bell, Luke Combs, Charlie Handsome, Hoskins, Jelly Roll, Megan Moroney leh Kacey Musgraves ten pathum theuh an nei bawk.
Morgan Wallen hian kum li kalta khan new artist of te year award a dawng a, chu bak chu CMA award a la dawn belh miah lo. Wallen hian chi inthliarna rawngkai tawngkam a hmang lai video a darh a, hei vang hian award show hrang hrangah pawh a hnawng deuh titih hman a, mahse, a album leh hla te hralh a kal em em reng tho a, kumin chu CMA a dawn belh tawh ngeiin a rinawm.
Chris Stapleton pawh a tum riat nan award ngaihhlut ber entertainer of the year-ah nominate a ni leh a, mahse, he category-ah hian tum sarih nominate a lo nih tawhnaah award a la dawng miah lo a, CMA history-ah he category-a award dawng si lo a nomination a lang ngun ber a ni tawh. Entertainer of the year-ah hian a tum thum nganan Luke Combs pawh nominate leh a ni a, Wallen (vawi thumna) leh Lainey Wilson (vawi hnihna) te pawh langin, a vawi khat nan Jelly Roll nominate a ni bawk.
2024 CMA Awards eligibility period hi July ni 1, 2023 leh June ni 30, 2024 inkar a ni a, hei vang hian album hriathlawh Zach Bryan ‘The Great American Bar Scene,’ Lainey Wilson ‘Whirlwind’ leh Post Malone ‘F-1 Trillion’ te pawh kumin nomination-ah an lang thei lo a ni.
New artist of the year category-ah Moroney, Shaboozey, Nate Smith, Mitchell Tenpenny, Zach Top leh Bailey Zimmerman te nominate an ni a, Moroney hi nikum khan he category-ah hian nominate a ni tawh a, Zimmerman pawh kum hnih kalta khan nominate a lo ni tawh bawk. CMA rules-ah hian he category-ah hian award an dawn loh chuan artist te hi tum hnih nominate theih an ni.
Shaboozey hi mihang zaithiam zinga new artist of the year category-ah nominate ni thei pangana a ni. He category-a mihang artist nominate lo ni tawh te chu 1985-ah Ray Charles a lang a, 2009-ah Darius Rucker lang lehin, 2021-ah Jimmie Allen leh Mickey Guyton an lang bawk. Rucker leh Allen te hian award an dawng ve ve a, mihang zaithiam zinga he category-a award dawng thei awm chhun an la ni.
Kumin hian female vocalist of the year category-ah Miranda Lambert a lang lo tlat mai a, ani hi kum 17 chhung a zawnin he category-ah hian nominate a lo ni tawh. Carrie Underwood pawh entertainer of the year-ah a lang lo a, ani pawh hi he category-ah hian kum nga chhung a zawnin nominate a lo ni tawh bawk.
58th Annual CMA Awards hi November ni 20 hian Nashville-a Bridgestone Arena-ah an sem dawn a, award dawng tur hi CMA voting member ten ballot hmangin an thlang ang a, chu chu broadcast professional ten an endik leh hnuah award dawng tur hi tihfel a ni dawn chauh a ni.