Paris 2024 Summer Olympic leh Paralympic Games-ah hian Ukraine run mektu Russia leh an thurualpui Belarus ram atanga infiammite an inlan thei dawn em tih zawhna a len chhoh deuh deuh laiin Paris khaw mayor Anne Hidalgo chuan chutiang ngaihtuahna ringawt pawh chu a tiha tih sa loh a nih thu sawiin, tel ve tura suangtuah ringawt pawh rem loa a ngaih thu a sawi-chhuak hmiah!
French sports daily L’Equipe -in an kawm-naah tunkar Thawhlehni khan mayor nu rothap zet chuan an ram na-tional flag behchhana Russian leh Belarusian athlete-te teltir tumna chu a theihna zawng zawng nena a dodal tur thu a sawi.
Kumin January thla mai khan International Olympic Committee (IOC) chuan ram beh-chhan nei lo (neutral athlete) nihna nena Ukraine doa inthurual ram atanga infiammi tel ve phalsak chungchang an sawiri a, Ukraine lamin na taka an dodal thu an puan hnu lawkah Paris mayor hi a tawng-chhuak zui ve ta a ni.
Games thlen hma ni 500 la awmah Hidalgo chuan, “Chuti ang hlim-thla hnutchhiah IOC-in a remti ang tih ngaihdan hi second khat lek pawh put ka duh lo. Chuvangin he thil hi a thlen lohna turin theihtawp ka chhuah dawn ang,” a ti.
Thla hmasa mai khan Hidalgo hian neutral anga Russian athlete-te tel ve dodalna atan July 26-Aug 11 Games-ah hian IOC hnuaia refugee team hminga chhuah lam a sawiri a, tuntuma Russian indo thlawhna leh bomd hlauhawm ber ber tuar mek Ukraine runtute chungchang a sawichhuahah erawh refugee team pawh a lam ri duh ta lo!
Mayor chuan an ram khawpui chu human rights khawpui a nih avangin mihring dikna palzuttute dangbet tura chetchhuah thuai a tul thu uar takin a sawi zui.
2024 Olympic-a Russian inlan remti lo burtu Paris Mayor
![](https://theaizawlpost.org/wp-content/uploads/tap_logo-min-large.jpg)