Kumin Oscar chu Latin star lam an lang tam dawn riau mai, Puerto Rican superstar pahnih- Bad Bunny leh Rita Moreno te chu March ni 10-a award sem hunah presenter tur an puan thar zingah an tel a, Latin star Becky G chu award semnaah hian a perform dawn bawk. Presenter tur an puan thar zingah hian Chris Hemsworth, Dwayne Johnson, Michael Keaton, Regina King, Jennifer Lawrence, Kate McKinnon, John Mulaney, Catherine O’Hara, Octavia Spencer leh Ramy Youssef te pawh an tel.
Moreno hian 1962 khan West Side Story atangin Oscar a lo dawng tawh a, 1977-ah entertainment khawvela award ngaihhlut chi li dawng kim vekin EGOT a dawng kim thei a, Latin zinga hetiang tithei hmasa ber a nih chuan a nawlpuiah pawh a pathumna a ni pha.
Bad Bunny pawh hian a album ‘Un Verano Sin Ti’ hmangin record a siam a, Spanish hla hlang awmna album, Billboard year-end chart-a No.1 kai pui thei hmasa ber a ni a, kumin Grammy-ah album of the year category-ah nominate a ni bawk.
Becky G hian ‘The Fire Inside’ tih hla a perform dawn a, he hla hi Oscar-ah hian nominate a ni nghe nghe.
Kumin Oscar presenter tur an puan tawh zingah Mahershala Ali, Nicolas Cage, Jamie Lee Curtis, Brendan Fraser, Jessica Lange, Matthew McConaughey, Lupita Nyong’o, Al Pacino, Michelle Pfeiffer, Ke Huy Quan, Sam Rockwell, Michelle Yeoh leh Zendaya te an tel tawh bawk a ni.
Kumin Oscar hi a vawi 96-na tur a ni tawh a, an rama March ni 10 (keini tan March ni 11 a ni hman tawh ang) hian Dolby Theatre, Ovation Hollywood-ah an sem dawn a, Jimmy Kimmel-a’n a host dawn a ni.
2024 Oscar presenter tur puan belh zingah Bad Bunny leh Rita Moreno an tel
![](https://theaizawlpost.org/wp-content/uploads/Clipboard01-117.jpg)