September ni 8 thleng awh tur Paralympic Summer Games dawltu France hian kum 1992 daih tawh khan Tignes leh Albertville hmunah Paralympic Winter Games chu a lo thleng ve tawh a, tun hi summer Paralympics bik a mikhual vawikhatna a ni.
Games hnuhnung pahnih ang lo takin kumin Paralympics-ah hian inelna (sport) dang telh thar a ni lo a; Rio Games-ah khan Para-triathlon leh Para-canoe chuan an debut nghakchhuakin, Tokyo-ah khan tunhmaa la awm ngai lo Para-taekwondo leh Para-badminton chuan hmun an lo chang thar tawh a, Paris programme-ah hi chuan sport chi thar dahluh a ni ta lo.
Chutih laiin badminton leh taekwondo programme ve ve erawh pawhsei niin, he infiamna chi hnih hian hmeichhia bikah medal event ngah ber nihna an chang.
Paralympic Games kal mekah hian National Paralympic Committee (NPC) 167 atanga infiammi kalkhawm bakah infiammi pariat awmna Refugee Paralympic Team (RPT) leh Ukraine an dorawn mek avanga an hminga infiammi tir thei lo Russia leh Belarus atanga chhuak Neutral Paralympic Athletes (NPA) team (delegation) hmuh tur an awm bawk.
London 2012 kha chhuak (delegation) tam ber tum niin team 164 an inlan a; Tokyo 2020 kha infiammi (athlete) chhuah hnem ber niin 4,393-in inelna an hmachhawn a; delegation 168 atanga athlete 4,400 vel awmna kumin Paris Games hian team leh infiammi tel tam lamah Paralympic Games record thar a rawn siam ta a ni.
Paralympics hmasaber hi kum 1960 khan Rome khawpuia nghah ni mah se chu mi hma thangkhat zet liamtaah khan Britain ramah he Games chi hi kuitiah a lo ni tawh.
A hun laia neurologist thiam leh lar Sir Ludwig Guttman an tih khan Aylesbury hmuna Stoke Mandeville Hospital-ah World War II veteran rualho spinal injury a enkawl thin a, chu’ng a damlo enkawlte pual chuan ngai an awhlehna rahbi (rehabilitation programme) ni nghal atan infiamna a tihpui thin a, chu chu Paralympic Games lo irhchhuahna bulpuia ngaih a ni.
Kum 1948 khan he doctor hian London Olympics laiin a damdawi in thawhna bakah damdawi in danga damlote nen intihsiak a buatsaih a, a hnu kum 10 chhung chu Britain rama spinal injury unit hrang hrangin he infiamna idea hi an zawm chho ve ta a ni.
Kum 1960 a rawn herchhuah meuh chuan Italy khawpui Rome-ah Paralympics hmasabera ngaih leh pawm chu nghah a lo ni ta a ni.
Chutih laia an intihsiakna hming chu Annual International Stoke Mandeville Games vawikuana tih a la ni a, tun hnu hian Rome 1960 Paralympic Games ti sawi a ni zui ta a ni.
Rome-ah khan ram hrang hrang 23 atanga infiammi (wheelchair athlete) 400 chhuakkhawmte chuan infiamna (sport) chi hrang pariat behchhana inelna (medal event) 57 hmangin Paralympic Games hmasaberah medal an inchuh.
Paris Paralympic programme-ah hian sport chi hrang 22 hmangin intihsiak kalpui a ni a, chu’ng infiamnate chu:
Blind football
Boccia
Goalball
Para-archery
Para-athletics
Para-badminton
Para-canoe
Para-cycling
Para-equestrian
Para-judo
Para-powerlifting
Para-rowing
Para-swimming
Para-table tennis
Para-taekwondo
Para-triathlon
Shooting Para-sport
Sitting volleyball
Wheelchair basketball
Wheelchair fencing
Wheelchair rugby
Wheelchair tennis