2024 SAG Awards-ah Oppenheimer a langsar ber
Film leh television lama chawimawina ngaihhlut hlawh tak 30th annual Screen Actors Guild (SAG) Awards chu niminpiah khan an sem ta a, award semna hi Shrine Auditorium & Expo Hall, Los Angeles-ah neih niin, show hi Netflix-ah an tichhuak a, film category-ah Oppenheimer a langsar ber a, award pathum a dawng. Hetihrual hian Barbie-in nomination pali a neihah award pakhatmah a dawng lo thung. TV lamah The Bear a langsar ber a, award pathum dawngin, Ted Lasso-in nomination pali neihah award pakhatmah a dawng lo ve bawk.
SAG Awards hi Oscar aitechhinna ti te pawhin an sawi thin a, he award a chetha te hi lemchan lama chawimawina sang ber Oscar Awards-ah pawh an chetha chhunzawm duh riau a, chuvangin he award pawh hian ngaihhlut a hlawh phah hle a ni.
Oppenheimer hian outstanding performance by a cast in a motion picture-ah award a dawng a, he category-a award dawng tu hian tun kum 10 chhung chu Oscar award-ah best picture an dawng zui zat zat a, hei vang hian Oppenheimer hi March ni 10-a sem tur Oscar-ah best picture dawng thei tura rinkai ber a ni zui ta a ni.
TV lamah Sucession-in ourstanding performance by an ensemble in a drama series a dawng leh a, tun kum thum chhungin he category-ah hian award pahnih a dawnna a ni ta a, comedy lama he award tlukpui chu The Bear-in a vawi khat nan a dawng ve bawk.
SAG Awards hi SAG-AFTRA member 1,19,515 ten vote hmangin award dawng tur hi an thlang thin a, award hrang hrangah voting member tam berna a ni a, vote hi award sem hma ni thlengin a lut reng a ni.
2024 SAG Awards-ah Oppenheimer a langsar ber
